Subscribe to our newsletter and get our newest updates

Varis Kirmani

  • Ghazal


aashiq hue to ishq mein hoshyar kyun na the


āshiq hue to ishq meñ hoshyār kyuuñ na the
ham in ke madah-ḳhvāñ sar-e-bāzār kyuuñ na the

haañ jab sitam ko ain karam kah rahe the log
ham bhī sharīk-e-garmī-e-guftār kyuuñ na the

jab chal rahā thā vaqt pe jaadū nigāh kā
ik ham asīr-e-chashm-e-fusūñ-kār kyuuñ na the

ab kyā shahīd-e-nāz bane phir rahe haiñ log
marne kā shauq thā to sardār kyuuñ na the

'vāris' ye shā.irī sam-e-qātil se kam nahīñ
aap is balā-e-jāñ se ḳhabar-dār kyuuñ na the

aashiq hue to ishq mein hoshyar kyun na the
hum in ke madah-KHwan sar-e-bazar kyun na the

han jab sitam ko ain karam kah rahe the log
hum bhi sharik-e-garmi-e-guftar kyun na the

jab chal raha tha waqt pe jadu nigah ka
ek hum asir-e-chashm-e-fusun-kar kyun na the

ab kya shahid-e-naz bane phir rahe hain log
marne ka shauq tha to sardar kyun na the

'waris' ye shairi sam-e-qatil se kam nahin
aap is bala-e-jaan se KHabar-dar kyun na the


Leave a comment

+