jo jhuk ke milte the jalsoñ meñ mehrbāñ kī tarah
hue haiñ sar pe musallat vo āsmāñ kī tarah

mujhe jo kholo to sāhil qarīb kar dūñgā
samundaroñ meñ maiñ rahtā huuñ bādbāñ kī tarah

tumhāre shahar ke jabrī nizām meñ kuchh log
kabhī hañse bhī to āvāz thī fuġhāñ kī tarah

hai tez dhuup safar lambā par tumhārī yaad
hai ek saaya mire sar pe sā.ebāñ kī tarah

na koī patta harā hai na koī phuul khilā
bahār bhī mire ghar aa.ī hai ḳhizāñ kī tarah

na saaf zehan na chehre ke ḳhāl-o-ḳhat raushan
fazāoñ meñ hai har ik shai dhuāñ dhuāñ kī tarah

jahāñ bhī jā.ūñ maiñ vo dasht ho ki dariyā ho
duā.eñ maañ kī chaleñ saath pāsbāñ kī tarah

'nazar' ke naam kā ik shaḳhs kuchh junūnī sā
akelā dasht meñ chaltā hai kārvāñ kī tarah

jo jhuk ke milte the jalson mein mehrban ki tarah
hue hain sar pe musallat wo aasman ki tarah

mujhe jo kholo to sahil qarib kar dunga
samundaron mein main rahta hun baadban ki tarah

tumhaare shahar ke jabri nizam mein kuchh log
kabhi hanse bhi to aawaz thi fughan ki tarah

hai tez dhup safar lamba par tumhaari yaad
hai ek saya mere sar pe saeban ki tarah

na koi patta hara hai na koi phul khila
bahaar bhi mere ghar aai hai KHizan ki tarah

na saf zehan na chehre ke KHal-o-KHat raushan
fazaon mein hai har ek shai dhuan dhuan ki tarah

jahan bhi jaun main wo dasht ho ki dariya ho
duaen man ki chalen sath pasban ki tarah

'nazar' ke nam ka ek shaKHs kuchh jununi sa
akela dasht mein chalta hai karwan ki tarah

Source: Book : Aqleem (Pg. 56) Author : Jafar Baloch Publication : Maktaba aalia, Urdu Bazar Lahore (1986) Edition : 1986