Subscribe to our newsletter and get our newest updates

Basheer Ahmad Basheer

  • Ghazal


in chaTaKHte pattharon par panw dharna dhyan se


in chaTaḳhte pattharoñ par paañv dharnā dhyān se
Dhal chukī hai shaam vaadī meñ utarnā dhyān se

jāmid-o-sākit sahī dīvār-o-dar bahre nahīñ
ghar kī tanhā.ī ho phir bhī baat karnā dhyān se

kaan mat dharnā kisī āvāz par kaisī bhī ho
koī roke bhī to raste meñ Thaharnā dhyān se

dekhnā saaya kahīñ koī ta.āqub meñ na ho
shahr kī vīrān galiyoñ se guzarnā dhyān se

raah meñ dekho koī manzar to rakhnā zehn meñ
phir kahīñ fursat mile to rañg bharnā dhyān se

kitne sūraj tum se pahle is safar meñ jal-bujhe
is jahān-e-tīra-ḳhātir par ubharnā dhyān se

vaqt ke saath apne andāze ġhalat nikle 'bashīr'
kis qadar mushkil hai pyāroñ kā utarnā dhyān se

in chaTaKHte pattharon par panw dharna dhyan se
Dhal chuki hai sham wadi mein utarna dhyan se

jamid-o-sakit sahi diwar-o-dar bahre nahin
ghar ki tanhai ho phir bhi baat karna dhyan se

kan mat dharna kisi aawaz par kaisi bhi ho
koi roke bhi to raste mein Thaharna dhyan se

dekhna saya kahin koi taaqub mein na ho
shahr ki viran galiyon se guzarna dhyan se

rah mein dekho koi manzar to rakhna zehn mein
phir kahin fursat mile to rang bharna dhyan se

kitne suraj tum se pahle is safar mein jal-bujhe
is jahan-e-tira-KHatir par ubharna dhyan se

waqt ke sath apne andaze ghalat nikle 'bashir'
kis qadar mushkil hai pyaron ka utarna dhyan se


Source: Funoon(Jadeed Ghazal Number: Volume-002)

Leave a comment

+