Subscribe to our newsletter and get our newest updates

Ghulam Husain Sajid

  • Ghazal


shaguft-e-ab se miTTi ko aaina karte


shaguft-e-āb se miTTī ko aa.ina karte
charāġh sard na hote to zamzama karte

bahut se rañg bhī rakhte haiñ tāqat-e-parvāz
havā meñ sirf parinde nahīñ uḌā karte

asar na lījiye is garm-o-sard kā dil par
ki shor-o-shar se pareshāñ nahīñ huā karte

bañdhe hue the mire haath bhī tumhārī tarah
vafā sarisht meñ hotī to ham vafā karte

zamīn oḌh ke so.e haiñ sāhibān-e-ishq
ab us galī ke darīche nahīñ khulā karte

ajiib pyaas thī us dil-rubā kī āñkhoñ meñ
ham un ko chuum na lete to aur kyā karte

bahut kushāda thī ye arz-e-pāk un par bhī
agar vo ghar se nikalne kā hausla karte

jagah na dete kisī ḳhauf ko kabhī dil meñ
kisī se ishq jo karte to barmalā karte

agar ḳharāb hue mehr-o-māh ke hāthoñ
kisī charāġh ke haq meñ to kuchh duā karte

ḳhayāl un ko na hotā agar mohabbat kā
kabhī vo niiñd meñ chalte na rat-jagā karte

badal diyā hai zamāne ne us ko bhī 'sājid'
phir ek baar kabhī us se rābta karte

shaguft-e-ab se miTTi ko aaina karte
charagh sard na hote to zamzama karte

bahut se rang bhi rakhte hain taqat-e-parwaz
hawa mein sirf parinde nahin uDa karte

asar na lijiye is garm-o-sard ka dil par
ki shor-o-shar se pareshan nahin hua karte

bandhe hue the mere hath bhi tumhaari tarah
wafa sarisht mein hoti to hum wafa karte

zamin oDh ke soe hain sahiban-e-ishq
ab us gali ke dariche nahin khula karte

ajib pyas thi us dil-ruba ki aankhon mein
hum un ko chum na lete to aur kya karte

bahut kushada thi ye arz-e-pak un par bhi
agar wo ghar se nikalne ka hausla karte

jagah na dete kisi KHauf ko kabhi dil mein
kisi se ishq jo karte to barmala karte

agar KHarab hue mehr-o-mah ke hathon
kisi charagh ke haq mein to kuchh dua karte

KHayal un ko na hota agar mohabbat ka
kabhi wo nind mein chalte na rat-jaga karte

badal diya hai zamane ne us ko bhi 'sajid'
phir ek bar kabhi us se rabta karte


Leave a comment

+