dil meñ rakh zaḳhm-e-navā raah meñ kaam aa.egā
dasht-e-be-samt meñ ik hū kā maqām aa.egā

is tarah paḌhtā huuñ bahte hue dariyā kī kitāb
saf.ha-e-āb par ik aks-e-payām aa.egā

qarya-e-jāñ meñ the yādoñ ke shanāsā chehre
ajnabī shahr meñ kis kis kā salām aa.egā

maslahat-kesh to gul-hā-e-satā.ish se lade
sach ke hāthoñ meñ vahī zahr kā jaam aa.egā

raqs-e-raftār se kyā rauñd chalā phūloñ ko
aag par chal ki tujhe lutf-e-ḳhirām aa.egā

ḳhanjar-e-zahr-e-vafā dil meñ chhupā.e kab se
muntazir huuñ ki idhar vo sar-e-shām aa.egā

dīda-e-dil se 'zafar' ḳhvāb bhī chhin jā.eñge
vaqt kahtā hai ki ab aisā nizām aa.egā

dil mein rakh zaKHm-e-nawa rah mein kaam aaega
dasht-e-be-samt mein ek hu ka maqam aaega

is tarah paDhta hun bahte hue dariya ki kitab
safha-e-ab par ek aks-e-payam aaega

qarya-e-jaan mein the yaadon ke shanasa chehre
ajnabi shahr mein kis kis ka salam aaega

maslahat-kesh to gul-ha-e-sataish se lade
sach ke hathon mein wahi zahr ka jam aaega

raqs-e-raftar se kya raund chala phulon ko
aag par chal ki tujhe lutf-e-KHiram aaega

KHanjar-e-zahr-e-wafa dil mein chhupae kab se
muntazir hun ki idhar wo sar-e-sham aaega

dida-e-dil se 'zafar' KHwab bhi chhin jaenge
waqt kahta hai ki ab aisa nizam aaega

Source: Funoon(Jadeed Ghazal Number: Volume-002)