Subscribe to our newsletter and get our newest updates

Jameel Malik

  • Ghazal


kis ki mahfil se uTh ke aaya hun


kis kī mahfil se uTh ke aayā huuñ
apne ghar meñ huuñ aur tanhā huuñ

tū mirī zindagī kī shaam na ban
maiñ tirī sub.h kā ujālā huuñ

chāñd meñ bastiyāñ basā lenā
mujh ko DhūñDho ki maiñ bhī duniyā huuñ

jān-e-imroz raunaq-e-fardā
koī samjhe mujhe to kyā kyā huuñ

kaise jhuTlā.egī mujhe duniyā
maiñ ki hālāt kā taqāzā huuñ

merī ḳhushbū se bas rahe haiñ chaman
maiñ har ik shāḳh-e-gul se paidā huuñ

ye jahāñ mazra-e-tamannā hai
aur maiñ hāsil-e-tamannā huuñ

kis ki mahfil se uTh ke aaya hun
apne ghar mein hun aur tanha hun

tu meri zindagi ki sham na ban
main teri subh ka ujala hun

chand mein bastiyan basa lena
mujh ko DhunDho ki main bhi duniya hun

jaan-e-imroz raunaq-e-farda
koi samjhe mujhe to kya kya hun

kaise jhuTlaegi mujhe duniya
main ki haalat ka taqaza hun

meri KHushbu se bas rahe hain chaman
main har ek shaKH-e-gul se paida hun

ye jahan mazra-e-tamanna hai
aur main hasil-e-tamanna hun


Source:

Leave a comment

+