jo maze aaj tire ġham ke azāboñ meñ mile
aisī lazzat kahāñ saaqī kī sharāboñ meñ mile

saarī duniyā se nahīñ un ko hai parda lekin
vo mile jab bhī mile mujh ko naqāboñ meñ mile

terī ḳhushbū se mo.attar hai zamāna saarā
kaise mumkin hai vo ḳhushbū bhī gulāboñ meñ mile

zindagānī meñ nasīhat nahīñ kaam aatī hai
dars-e-aḳhlāq faqat mujh ko kitāboñ meñ mile

maiñ ne phūloñ se bhī nāzuk se savālāt kiye
mujh ko patthar se hī alfāz javāboñ meñ mile

pyaar ke baab meñ ab naam kahāñ hai terā
koī tahrīr-e-vafā kaise nisāboñ meñ mile

kyā pata kal jo baḌī shaan meñ gum thā 'āzam'
ab vahī shaḳhs tujhe ḳhāna-ḳharāboñ meñ mile

jo maze aaj tere gham ke azabon mein mile
aisi lazzat kahan saqi ki sharabon mein mile

sari duniya se nahin un ko hai parda lekin
wo mile jab bhi mile mujh ko naqabon mein mile

teri KHushbu se moattar hai zamana sara
kaise mumkin hai wo KHushbu bhi gulabon mein mile

zindagani mein nasihat nahin kaam aati hai
dars-e-aKHlaq faqat mujh ko kitabon mein mile

main ne phulon se bhi nazuk se sawalat kiye
mujh ko patthar se hi alfaz jawabon mein mile

pyar ke bab mein ab nam kahan hai tera
koi tahrir-e-wafa kaise nisabon mein mile

kya pata kal jo baDi shan mein gum tha 'azam'
ab wahi shaKHs tujhe KHana-KHarabon mein mile

Source: Book : Aiwan (Pg. 22) Author : Manazir Ashiq Harganvi & Shahid Nayeem Publication : Nirali Duniya (1998) Edition : 1998