marhala ab ke digar hai aa.ine ke sāmne
mo'tabar nā-mo'tabar hai aa.ine ke sāmne

aaj shāyad ā.īne kā jhuuT pakḌā jā.egā
aaj vo sāhab-nazar hai aa.ine ke sāmne

dhund meñ Duube ho.e saare manāzir dekh kar
aa.ine kī aañkh tar hai aa.ine ke sāmne

jhurriyāñ chehre kī ye bachpan kī vo ma.asūmiyat
ek lamhe kā safar hai aa.ine ke sāmne

har nafas be-chehragī kā karb kab tak jheltā
ab na.ī samt-e-safar hai aa.ine ke sāmne

kaun hai jo apne chehre se nahīñ Dartā 'nadīm'
kaun be-ḳhauf-o-ḳhatar hai aa.ine ke sāmne

marhala ab ke digar hai aaine ke samne
mo'tabar na-mo'tabar hai aaine ke samne

aaj shayad aaine ka jhuT pakDa jaega
aaj wo sahab-nazar hai aaine ke samne

dhund mein Dube hoe sare manazir dekh kar
aaine ki aankh tar hai aaine ke samne

jhurriyan chehre ki ye bachpan ki wo masumiyat
ek lamhe ka safar hai aaine ke samne

har nafas be-chehragi ka karb kab tak jhelta
ab nai samt-e-safar hai aaine ke samne

kaun hai jo apne chehre se nahin Darta 'nadim'
kaun be-KHauf-o-KHatar hai aaine ke samne