ek tārīḳh muqarrar pe to har maah mile
jaise daftar meñ kisī shaḳhs ko tanḳhvāh mile

rañg ukhaḌ jaa.e to zāhir ho plastar kī namī
qahqaha khod ke dekho to tumheñ aah mile

jam.a the raat mire ghar tire Thukrā.e hue
ek dargāh pe sab rāñda-e-dargāh mile

maiñ to ik aam sipāhī thā hifāzat ke liye
shāh-zādī ye tirā haq thā tujhe shaah mile

ek udāsī ke jazīre pe huuñ ashkoñ meñ ghirā
maiñ nikal jā.ūñ agar ḳhushk guzargāh mile

ik mulāqāt ke Talne kī ḳhabar aise lagī
jaise mazdūr ko haḌtāl kī afvāh mile

ghar pahuñchne kī na jaldī na tamannā hai koī
jis ne milnā ho mujhe aa.e sar-e-rāh mile

ek tariKH muqarrar pe to har mah mile
jaise daftar mein kisi shaKHs ko tanKHwah mile

rang ukhaD jae to zahir ho plastar ki nami
qahqaha khod ke dekho to tumhein aah mile

jama the raat mere ghar tere Thukrae hue
ek dargah pe sab randa-e-dargah mile

main to ek aam sipahi tha hifazat ke liye
shah-zadi ye tera haq tha tujhe shah mile

ek udasi ke jazire pe hun ashkon mein ghira
main nikal jaun agar KHushk guzargah mile

ek mulaqat ke Talne ki KHabar aise lagi
jaise mazdur ko haDtal ki afwah mile

ghar pahunchne ki na jaldi na tamanna hai koi
jis ne milna ho mujhe aae sar-e-rah mile