sab ko ye fikr haath se ab ek pal na jaa.e
duniyā hudūd-e-vaqt se aage nikal na jaa.e

sab ko fareb de magar itnā rahe ḳhayāl
bahrūp bharte bharte ye chehra badal na jaa.e

ġham se nibāh kījiye is tamkanat ke saath
dil kā sharāra aañkh kī had tak machal na jaa.e

zauq-e-nazar diyā hai to zarf-e-nazar bhī de
Dar hai mujhe shu.ūr kī vus.at nigal na jaa.e

suntā huuñ aap merī ayādat ko ā.eñge
kartā huuñ sau jatan ki tabī.at sambhal na jaa.e

vo dard hai ki phaT na paḌe dil kahīñ 'nadīm'
vo ḳhauf hai ki riiḌh kī haDDī pighal na jaa.e

sab ko ye fikr hath se ab ek pal na jae
duniya hudud-e-waqt se aage nikal na jae

sab ko fareb de magar itna rahe KHayal
bahrup bharte bharte ye chehra badal na jae

gham se nibah kijiye is tamkanat ke sath
dil ka sharara aankh ki had tak machal na jae

zauq-e-nazar diya hai to zarf-e-nazar bhi de
Dar hai mujhe shuur ki wusat nigal na jae

sunta hun aap meri ayaadat ko aaenge
karta hun sau jatan ki tabiat sambhal na jae

wo dard hai ki phaT na paDe dil kahin 'nadim'
wo KHauf hai ki riDh ki haDDi pighal na jae