namāz kaisī kahāñ kā roza abhī maiñ shaġhl-e-sharāb meñ huuñ
ḳhudā kī yaad aa.e kis tarah se butoñ ke qahr-o-itāb meñ huuñ

sharāb kā shaġhl ho rahā hai baġhal meñ paatā huuñ maiñ kisī ko
maiñ jāgtā huuñ ki so rahā huuñ ḳhayāl meñ huuñ ki ḳhvāb meñ huuñ

na chheḌ is vaqt mujh ko zāhid nahīñ ye mauqa.a hai guftugū kā
savār jaatā hai vo sharābī maiñ hāzir us kī rikāb meñ huuñ

kabhī sharābī kabhī namāzī kabhī huuñ maiñ rind-gāh zāhid
ḳhudā kā Dar hai butoñ kā khaTkā ajab tarah ke azaab meñ huuñ

qayāmat aane kā ḳhauf kaisā taraddud-o-fikr kyuuñ hai 'āġhā'
hisāb kyā koī mujh se legā batā to maiñ kis hisāb meñ huuñ

namaz kaisi kahan ka roza abhi main shaghl-e-sharab mein hun
KHuda ki yaad aae kis tarah se buton ke qahr-o-itab mein hun

sharab ka shaghl ho raha hai baghal mein pata hun main kisi ko
main jagta hun ki so raha hun KHayal mein hun ki KHwab mein hun

na chheD is waqt mujh ko zahid nahin ye mauqa hai guftugu ka
sawar jata hai wo sharabi main hazir us ki rikab mein hun

kabhi sharabi kabhi namazi kabhi hun main rind-gah zahid
KHuda ka Dar hai buton ka khaTka ajab tarah ke azab mein hun

qayamat aane ka KHauf kaisa taraddud-o-fikr kyun hai 'agha'
hisab kya koi mujh se lega bata to main kis hisab mein hun

Source: Book : chera chera mery kahani (Pg. 82)