Subscribe to our newsletter and get our newest updates

Daood Mohsin

  • Ghazal


sahma hai aasman zamin bhi udas hai


sahmā hai āsmān zamīñ bhī udaas hai
har gaañv aur shahr meñ ḳhauf-o-hirās hai

ik lamha-e-sukūñ bhī mayassar nahīñ hameñ
tere baġhair apnā har ik pal udaas hai

ye kaisī dilkashī hai yahāñ kaun aa gayā
kaisī ye raushnī sī mire ās-pās hai

āvārgī kā naam hai tahzīb-e-nau yahāñ
āñkhoñ meñ sharm hai na badan par libās hai

duniyā meñ apnī aap magan ham haiñ is tarah
apnoñ kā kuchh ḳhayāl na rishtoñ kā paas hai

masmūm sī havā.eñ pata de ga.iiñ hameñ
qātil hamārā koī yahīñ ās-pās hai

'mohsin' sunā hai ham ne ye kāmil faqīr se
hogā ḳhudā se āshnā jo ḳhud-shanās hai

sahma hai aasman zamin bhi udas hai
har ganw aur shahr mein KHauf-o-hiras hai

ek lamha-e-sukun bhi mayassar nahin hamein
tere baghair apna har ek pal udas hai

ye kaisi dilkashi hai yahan kaun aa gaya
kaisi ye raushni si mere aas-pas hai

aawargi ka nam hai tahzib-e-nau yahan
aankhon mein sharm hai na badan par libas hai

duniya mein apni aap magan hum hain is tarah
apnon ka kuchh KHayal na rishton ka pas hai

masmum si hawaen pata de gain hamein
qatil hamara koi yahin aas-pas hai

'mohsin' suna hai hum ne ye kaamil faqir se
hoga KHuda se aashna jo KHud-shanas hai


Leave a comment

+