Subscribe to our newsletter and get our newest updates

Dattatriya Kaifi

  • Ghazal


gham-e-duniya nahin phir kaun sa gham hai hum ko


ġham-e-duniyā nahīñ phir kaun sā ġham hai ham ko
fikr-o-andesha-e-uqbā se bhī ram hai ham ko

dahn-e-ġhuncha se paiġhām-e-vafā sunte haiñ
ġhāza-e-āriz-e-sad-hast-e-adam hai ham ko

qaul ye sach hai ki ḳhud-karda kā darmāñ kyā hai
dāvar-e-hashr pe nāhaq kā bharam hai ham ko

agle luqmoñ meñ nahīñ qand-e-mukarrar kā mazā
saḳht be-lutf-e-hayāt-e-paiham hai ham ko

ziist kī kashmakash aur marg kī qurbat kā alam
āmad-o-raft-e-nafas teġh-e-do-dam hai ham ko

baiThe baiThe jo kaTe phir tag-o-dau se hāsil
har-nafas jāda-e-hastī meñ qadam hai ham ko

zarre zarre meñ nazar aatī hai tasvīr-e-sanam
sar-ba-sar rū-kash-e-sad-dair-o-haram hai ham ko

bār-e-ġham baar se ehsāñ ke badal jaatā hai
tauq-e-gardan kashish-e-kāf-e-karam hai ham ko

hāl-e-dil likhte na logoñ kī zabāñ meñ paḌte
vaj.h-e-añgusht-numā.ī ye qalam hai ham ko

aañkh kyā Dāliye us gul pe jo kumhlā jaa.e
'kaifī' apnā hī ye dil bāġh-e-iram hai ham ko

gham-e-duniya nahin phir kaun sa gham hai hum ko
fikr-o-andesha-e-uqba se bhi ram hai hum ko

dahn-e-ghuncha se paigham-e-wafa sunte hain
ghaza-e-ariz-e-sad-hast-e-adam hai hum ko

qaul ye sach hai ki KHud-karda ka darman kya hai
dawar-e-hashr pe nahaq ka bharam hai hum ko

agle luqmon mein nahin qand-e-mukarrar ka maza
saKHt be-lutf-e-hayat-e-paiham hai hum ko

zist ki kashmakash aur marg ki qurbat ka alam
aamad-o-raft-e-nafas tegh-e-do-dam hai hum ko

baiThe baiThe jo kaTe phir tag-o-dau se hasil
har-nafas jada-e-hasti mein qadam hai hum ko

zarre zarre mein nazar aati hai taswir-e-sanam
sar-ba-sar ru-kash-e-sad-dair-o-haram hai hum ko

bar-e-gham bar se ehsan ke badal jata hai
tauq-e-gardan kashish-e-kaf-e-karam hai hum ko

haal-e-dil likhte na logon ki zaban mein paDte
wajh-e-angusht-numai ye qalam hai hum ko

aankh kya Daliye us gul pe jo kumhla jae
'kaifi' apna hi ye dil bagh-e-iram hai hum ko


Source: Book : Waraq-e-saadah (Gazals) (Pg. 58) Author : Hamdam Kashmiri Publication : Hamdam Kashmiri, Khan Mahel, Shrinagar (2012) Edition : 2012

Leave a comment

+