Subscribe to our newsletter and get our newest updates

Nadeem Fazli

  • Ghazal


hamin pe tang ye waqt-e-rawan hua to kya


hamīñ pe tañg ye vaqt-e-ravāñ huā to kyā
darāz aur bhī kār-e-jahāñ huā to kyā

ye surḳh talve ye tanhā.ī āḳhirī hichkī
ab is se aage koī kārvāñ huā to kyā

ye rāste haiñ buzurgoñ kī ḳhaak se raushan
so maiñ bhī chal ke yahīñ rā.egāñ huā to kyā

yahāñ to shahr hī ātish-fishāñ kī zad par hai
jo apne siine meñ thoḌā dhuāñ huā to kyā

ġhurūr yuuñ hai ki us ke gadāgaroñ meñ huuñ
barā.e ḳhalq maiñ shāh-e-jahāñ huā to kyā

hamīñ ne dī thī jagah us ko apnī palkoñ meñ
vo zarra aaj jo koh-e-girāñ huā to kyā

jo kar sakā na kisī taur mutma.in ḳhud ko
savāl uThtā hai mojiz-bayāñ huā to kyā

tamām log samā.at se ho ga.e mahrūm
tab apnā lahja ġhazal kī zabāñ huā to kyā

'nadīm' aañkh meñ aañsū hai saare aalam kā
vatan hamārā jo hindostāñ huā to kyā

hamin pe tang ye waqt-e-rawan hua to kya
daraaz aur bhi kar-e-jahan hua to kya

ye surKH talwe ye tanhai aaKHiri hichki
ab is se aage koi karwan hua to kya

ye raste hain buzurgon ki KHak se raushan
so main bhi chal ke yahin raegan hua to kya

yahan to shahr hi aatish-fishan ki zad par hai
jo apne sine mein thoDa dhuan hua to kya

ghurur yun hai ki us ke gadagaron mein hun
barae KHalq main shah-e-jahan hua to kya

hamin ne di thi jagah us ko apni palkon mein
wo zarra aaj jo koh-e-giran hua to kya

jo kar saka na kisi taur mutmain KHud ko
sawal uThta hai mojiz-bayan hua to kya

tamam log samaat se ho gae mahrum
tab apna lahja ghazal ki zaban hua to kya

'nadim' aankh mein aansu hai sare aalam ka
watan hamara jo hindostan hua to kya


Leave a comment

+