yaar se ab ke gar milūñ 'tābāñ'
to phir us se judā na huuñ 'tābāñ'
yā bhare ab ke us se dil merā
ishq kā naam phir na luuñ 'tābāñ'
mujh se bīmār hai mirā zālim
ye sitam kis tarah sahūñ 'tābāñ'
aaj aayā hai yaar ghar mere
ye ḳhushī kis se maiñ kahūñ 'tābāñ'
maiñ to bezār us se huuñ lekin
dil ke hāthoñ se kyā karūñ 'tābāñ'
vo to suntā nahīñ kisī kī baat
us se maiñ haal kyā kahūñ 'tābāñ'
ba.ad muddat ke māh-rū aayā
kyuuñ na us ke gale lagūñ 'tābāñ'
yar se ab ke gar milun 'taban'
to phir us se juda na hun 'taban'
ya bhare ab ke us se dil mera
ishq ka nam phir na lun 'taban'
mujh se bimar hai mera zalim
ye sitam kis tarah sahun 'taban'
aaj aaya hai yar ghar mere
ye KHushi kis se main kahun 'taban'
main to bezar us se hun lekin
dil ke hathon se kya karun 'taban'
wo to sunta nahin kisi ki baat
us se main haal kya kahun 'taban'
baad muddat ke mah-ru aaya
kyun na us ke gale lagun 'taban'
Source: Rooh-e-Ghazal,Pachas Sala Intekhab
Leave a comment