laboñ par pyaas sab ke be-karāñ hai
har ik jānib magar andhā kuaañ hai

hai koī aks-e-rañgīñ aa.ine par
jab hī to aa.ine meñ kahkashāñ hai

judā.ī kā na qissa vasl kā hai
adhūrī kis qadar ye dāstāñ hai

kisī se koī bhī miltā nahīñ ab
har ik insāñ yahāñ to bad-gumāñ hai

nahīñ kuchh bolte haiñ jabr sah kar
lage tarshī huī sab kī zabāñ hai

vatan meñ rah ke bhī hai be-vatan ye
bahut mazlūm ye urdu zabāñ hai

kisī kā dard bāñTe ġham meñ ro.e
'zafar' ehsās logoñ meñ kahāñ hai

labon par pyas sab ke be-karan hai
har ek jaanib magar andha kuan hai

hai koi aks-e-rangin aaine par
jab hi to aaine mein kahkashan hai

judai ka na qissa wasl ka hai
adhuri kis qadar ye dastan hai

kisi se koi bhi milta nahin ab
har ek insan yahan to bad-guman hai

nahin kuchh bolte hain jabr sah kar
lage tarshi hui sab ki zaban hai

watan mein rah ke bhi hai be-watan ye
bahut mazlum ye urdu zaban hai

kisi ka dard banTe gham mein roe
'zafar' ehsas logon mein kahan hai

Source: Saaz-o-Naghma