Subscribe to our newsletter and get our newest updates

Zafar Iqbal

  • Ghazal


hamein bhi matlab-o-mani ki justuju hai bahut


hameñ bhī matlab-o-ma.anī kī justujū hai bahut
harīf-e-harf magar ab ke dū-ba-dū hai bahut

vaqār ghar kī tavāzo hī par nahīñ mauqūf
ba-faiz-e-shā.irī bāhar bhī aabrū hai bahut

phaTe purāne diloñ kī ḳhabar nahīñ letā
agarche jāntā hai hājat-e-rafū hai bahut

badan kā saarā lahū khiñch ke aa gayā ruḳh par
vo ek bosa hameñ de ke surḳh-rū hai bahut

idhar udhar yuuñ hī muñh mārte bhī haiñ lekin
ye mānte bhī haiñ dil se ki ham ko tū hai bahut

ab us kī diid mohabbat nahīñ zarūrat hai
ki us se mil ke bichhaḌne kī aarzū hai bahut

yahī hai be-sar-o-pā baat kahne kā mauqa.a
patā chalegā kise shor chār-sū hai bahut

ye haal hai to badan ko bachā.iye kab tak
sadā meñ dhuup bahut hai lahū meñ lū hai bahut

yahī hai fikr kahīñ maan hī na jaa.eñ 'zafar'
hamāre mojaza-e-fan pe guftugū hai bahut

hamein bhi matlab-o-mani ki justuju hai bahut
harif-e-harf magar ab ke du-ba-du hai bahut

waqar ghar ki tawazo hi par nahin mauquf
ba-faiz-e-shairi bahar bhi aabru hai bahut

phaTe purane dilon ki KHabar nahin leta
agarche jaanta hai hajat-e-rafu hai bahut

badan ka sara lahu khinch ke aa gaya ruKH par
wo ek bosa hamein de ke surKH-ru hai bahut

idhar udhar yun hi munh marte bhi hain lekin
ye mante bhi hain dil se ki hum ko tu hai bahut

ab us ki did mohabbat nahin zarurat hai
ki us se mil ke bichhaDne ki aarzu hai bahut

yahi hai be-sar-o-pa baat kahne ka mauqa
pata chalega kise shor chaar-su hai bahut

ye haal hai to badan ko bachaiye kab tak
sada mein dhup bahut hai lahu mein lu hai bahut

yahi hai fikr kahin man hi na jaen 'zafar'
hamare mojaza-e-fan pe guftugu hai bahut


Leave a comment

+