Subscribe to our newsletter and get our newest updates

Nafas Ambalvi

  • Ghazal


jo dasht mein mila tha mujhe itna yaad hai


jo dasht meñ milā thā mujhe itnā yaad hai
merā hī naqsh-e-pā thā mujhe itnā yaad hai

phir kyā huā kabhī mirī barbādiyoñ se pūchh
terī taraf chalā thā mujhe itnā yaad hai

itnā lahū lahū to nahīñ thā badan mirā
haañ zaḳhm ik harā thā mujhe itnā yaad hai

vo bhiiḌ meñ khaḌā hai jo patthar liye hue
kal tak mirā ḳhudā thā mujhe itnā yaad hai

maiñ jaise muddatoñ se isī rahguzar meñ huuñ
pal bhar kā fāslā thā mujhe itnā yaad hai

chehra kisī kā ab bhī tasavvur meñ hai 'nafas'
ik ajnabī milā thā mujhe itnā yaad hai

jo dasht mein mila tha mujhe itna yaad hai
mera hi naqsh-e-pa tha mujhe itna yaad hai

phir kya hua kabhi meri barbaadiyon se puchh
teri taraf chala tha mujhe itna yaad hai

itna lahu lahu to nahin tha badan mera
han zaKHm ek hara tha mujhe itna yaad hai

wo bhiD mein khaDa hai jo patthar liye hue
kal tak mera KHuda tha mujhe itna yaad hai

main jaise muddaton se isi rahguzar mein hun
pal bhar ka fasla tha mujhe itna yaad hai

chehra kisi ka ab bhi tasawwur mein hai 'nafas'
ek ajnabi mila tha mujhe itna yaad hai


Source: Book : Beesveen Sadi Ki Behtareen Ishqiya Ghazlen (Pg. 196)

Leave a comment

+