Subscribe to our newsletter and get our newest updates

Nadeem Sirsivi

  • Ghazal


dobara moajiza ho jaega kya


dobāra mo.ajiza ho jā.egā kyā
vo pāgal phir mirā ho jā.egā kyā

lahū taaza zamīñ par thūkne se
junūñ kā haq adā ho jā.egā kyā

ye dil baitushsharf hai hādsoñ kā
ye dil maskan tirā ho jā.egā kyā

añdherī raat kā dāman jalā kar
charāġhoñ kā bhalā ho jā.egā kyā

tirī āñkhoñ meñ pal-bhar jhāñkne se
mohabbat kā nasha ho jā.egā kyā

jise hāsil kiyā sab kuchh gañvā kar
vo aise hī judā ho jā.egā kyā

zarūrat jis ke aage sar jhukā de
batāo vo ḳhudā ho jā.egā kyā

qayāfa pārsā.ī kā banā kar
tū sach meñ pārsā ho jā.egā kyā

agar maiñ phoḌ duuñ sūraj kī āñkheñ
añdherā jā-ba-jā ho jā.egā kyā

ka.ī rāteñ musalsal jāgne se
tū ik shā.ir baḌā ho jā.egā kyā

mire ik lams kī hiddat pahan kar
vo patthar mom kā ho jā.egā kyā

hamāre be-bizā.at fāsloñ se
ta.alluq nāravā ho jā.egā kyā

vo kahte haiñ banī lamhe meñ duniyā
ye sab kuchh barmalā ho jā.egā kyā

haqīqat meñ tū mere sāmne hai
ye manzar ḳhvāb sā ho jā.egā kyā

'nadīm' ab maan jā ash.ār mat likh
to yūñhī bāvlā ho jā.egā kyā

dobara moajiza ho jaega kya
wo pagal phir mera ho jaega kya

lahu taza zamin par thukne se
junun ka haq ada ho jaega kya

ye dil baitushsharf hai hadson ka
ye dil maskan tera ho jaega kya

andheri raat ka daman jala kar
charaghon ka bhala ho jaega kya

teri aankhon mein pal-bhar jhankne se
mohabbat ka nasha ho jaega kya

jise hasil kiya sab kuchh ganwa kar
wo aise hi juda ho jaega kya

zarurat jis ke aage sar jhuka de
batao wo KHuda ho jaega kya

qayafa parsai ka bana kar
tu sach mein parsa ho jaega kya

agar main phoD dun suraj ki aankhen
andhera ja-ba-ja ho jaega kya

kai raaten musalsal jagne se
tu ek shair baDa ho jaega kya

mere ek lams ki hiddat pahan kar
wo patthar mom ka ho jaega kya

hamare be-bizaat faslon se
talluq narawa ho jaega kya

wo kahte hain bani lamhe mein duniya
ye sab kuchh barmala ho jaega kya

haqiqat mein tu mere samne hai
ye manzar KHwab sa ho jaega kya

'nadim' ab man ja ashaar mat likh
to yunhi bawla ho jaega kya


Source:

Leave a comment

+