aaj dil hai ki sar-e-shām bujhā lagtā hai
ye añdhere kā musāfir bhī thakā lagtā hai

apne bahke hue dāman kī ḳhabar lī na ga.ī
jis ko dekho charāġhoñ se ḳhafā lagtā hai

baaġh kā phuul nahīñ lāla-e-sahrā huuñ maiñ
lū kā jhoñkā bhī mujhe bād-e-sabā lagtā hai

tañgī-e-zarf-e-nazar kasrat-e-nazzāra-e-dahar
pyaas kachchī ho to har jaam bharā lagtā hai

kis takalluf se girah khol rahā huuñ dil kī
uqda-e-dard tirā band-e-qabā lagtā hai

ḳhār-zāroñ ko sikhā de na gulistāñ kā chalan
ye musāfir to koī ābla-pā lagtā hai

dekh tū rauzan-e-zindāñ se zarā sū-e-chaman
aaj kyuuñ dil kā har ik zaḳhm harā lagtā hai

kaun 'afzal' ke sivā aisī ġhazal chheḌegā
dosto ye vahī āshufta-navā lagtā hai

aaj dil hai ki sar-e-sham bujha lagta hai
ye andhere ka musafir bhi thaka lagta hai

apne bahke hue daman ki KHabar li na gai
jis ko dekho charaghon se KHafa lagta hai

bagh ka phul nahin lala-e-sahra hun main
lu ka jhonka bhi mujhe baad-e-saba lagta hai

tangi-e-zarf-e-nazar kasrat-e-nazzara-e-dahar
pyas kachchi ho to har jam bhara lagta hai

kis takalluf se girah khol raha hun dil ki
uqda-e-dard tera band-e-qaba lagta hai

KHar-zaron ko sikha de na gulistan ka chalan
ye musafir to koi aabla-pa lagta hai

dekh tu rauzan-e-zindan se zara su-e-chaman
aaj kyun dil ka har ek zaKHm hara lagta hai

kaun 'afzal' ke siwa aisi ghazal chheDega
dosto ye wahi aashufta-nawa lagta hai