aap apnā rū-e-zebā dekhiye
yā mujhe mahv-e-tamāshā dekhiye

shauq ko hañgāma-ārā dekhiye
kārobār hasrat-afzā dekhiye

rañg-e-gulzār-e-tamannā dekhiye
dilkashī-hā-e-tamāshā dekhiye

husn hai sau rañg meñ tahsīñ-talab
dīda-e-hairāñ se kyā kyā dekhiye

bazm meñ us be-muravvat kī mujhe
dekhnā paḌtā hai kyā kyā dekhiye

hasrat āñkhoñ meñ hai lab ḳhāmosh haiñ
sheva-e-arz-e-tamannā dekhiye

haa.e re zauq-e-tamāshā-e-jamāl
ḳhud tamāshā huuñ tamāshā dekhiye

aap ne phir kar na dekhā is taraf
ho gayā ḳhūn-e-tamannā dekhiye

uThtī haiñ nazreñ mirī kis shauq se
mujh ko hañgām-e-tamāshā dekhiye

hasratoñ kā haa.e re dil meñ hujūm
ārzūoñ kā natīja dekhiye

sajde ko betāb hotī haiñ jabīñ
shoḳhi-e-naqsh-e-kaf-e-pā dekhiye

maiñ huuñ us saaqī kā dīvāna jise
dekhiye jab mast-e-sahbā dekhiye

ḳhaak meñ kis din milātī hai mujhe
us se milne kī tamannā dekhiye

kahte haiñ kar leñge us kāfir ko raam
hazrat-e-'vahshat' kā daavā dekhiye

aap apna ru-e-zeba dekhiye
ya mujhe mahw-e-tamasha dekhiye

shauq ko hangama-ara dekhiye
karobar hasrat-afza dekhiye

rang-e-gulzar-e-tamanna dekhiye
dilkashi-ha-e-tamasha dekhiye

husn hai sau rang mein tahsin-talab
dida-e-hairan se kya kya dekhiye

bazm mein us be-murawwat ki mujhe
dekhna paDta hai kya kya dekhiye

hasrat aankhon mein hai lab KHamosh hain
shewa-e-arz-e-tamanna dekhiye

hae re zauq-e-tamasha-e-jamal
KHud tamasha hun tamasha dekhiye

aap ne phir kar na dekha is taraf
ho gaya KHun-e-tamanna dekhiye

uThti hain nazren meri kis shauq se
mujh ko hangam-e-tamasha dekhiye

hasraton ka hae re dil mein hujum
aarzuon ka natija dekhiye

sajde ko betab hoti hain jabin
shoKHi-e-naqsh-e-kaf-e-pa dekhiye

main hun us saqi ka diwana jise
dekhiye jab mast-e-sahba dekhiye

KHak mein kis din milati hai mujhe
us se milne ki tamanna dekhiye

kahte hain kar lenge us kafir ko ram
hazrat-e-'wahshat' ka dawa dekhiye

Source: Sulagti Soch Ke Saye