Subscribe to our newsletter and get our newest updates

Haidar Ali Aatish

  • Ghazal


zinde wahi hain jo ki hain tum par mare hue


zinde vahī haiñ jo ki haiñ tum par mare hue
baaqī jo haiñ so qabr meñ murde bhare hue

mast-e-alast qulzum-e-hastī meñ aa.e haiñ
misl-e-habāb apnā piyāla bhare hue

allāh-re safā-e-tan-e-nāznīn-e-yār
motī haiñ kuuT kuuT ke goyā bhare hue

do din se paañv jo nahīñ dabvā.e yaar ne
baiThe haiñ haath haath ke uupar dhare hue

in abrūoñ ke halqa meñ vo añkhḌiyāñ nahīñ
do taaq par haiñ do gul-e-nargis dhare hue

ba.ad-e-fanā bhī aa.egī mujh mast ko na niiñd
be-ḳhisht-e-ḳham lahad meñ sirhāne dhare hue

nikleñ jo ashk be-asar āñkhoñ se kyā ajab
paidā hue haiñ tifl hazāroñ mare hue

likkhe ga.e bayāzoñ meñ ash.ār-e-intiḳhāb
raa.ij rahe vahī ki jo sikke khare hue

ulTā safoñ ko teġh ne abrū-e-yār kī
tīr-e-mizha se darham-o-barham pare hue

'ātish' ḳhudā ne chāhā to dariyā-e-ishq meñ
kuude jo ab kī ham to vare se pare hue

zinde wahi hain jo ki hain tum par mare hue
baqi jo hain so qabr mein murde bhare hue

mast-e-alast qulzum-e-hasti mein aae hain
misl-e-habab apna piyala bhare hue

allah-re safa-e-tan-e-naznin-e-yar
moti hain kuT kuT ke goya bhare hue

do din se panw jo nahin dabwae yar ne
baiThe hain hath hath ke upar dhare hue

in abruon ke halqa mein wo ankhDiyan nahin
do taq par hain do gul-e-nargis dhare hue

baad-e-fana bhi aaegi mujh mast ko na nind
be-KHisht-e-KHam lahad mein sirhane dhare hue

niklen jo ashk be-asar aankhon se kya ajab
paida hue hain tifl hazaron mare hue

likkhe gae bayazon mein ashaar-e-intiKHab
raij rahe wahi ki jo sikke khare hue

ulTa safon ko tegh ne abru-e-yar ki
tir-e-mizha se darham-o-barham pare hue

'atish' KHuda ne chaha to dariya-e-ishq mein
kude jo ab ki hum to ware se pare hue


Leave a comment

+