vo sard fāsla bas aaj kaTne vaalā thā
maiñ ik charāġh kī lau se lipaTne vaalā thā

bahut bikherā mujhe mire mehrbānoñ ne
mirā vajūd hī lekin simaTne vaalā thā

bachā liyā tirī ḳhushbū ke farq ne varna
maiñ tere vahm meñ tujh se lipaTne vaalā thā

usī ko chūmtā rahtā thā vo ki us ko bhī
aziiz thā vahī baazū jo kaTne vaalā thā

mujhī ko raah badalnī thī so badal Daalī
kahīñ pahāḌ bhī Thokar se ha.Tne vaalā thā

talāsh jis kī thī vo harf mil gayā varna
maiñ ek saada varaq aur ulaTne vaalā thā

ye kis ko tiir chalāne kā shauq jaag uThā
vo baaz merī taraf hī jhapaTne vaalā thā

wo sard fasla bas aaj kaTne wala tha
main ek charagh ki lau se lipaTne wala tha

bahut bikhera mujhe mere mehrbanon ne
mera wajud hi lekin simaTne wala tha

bacha liya teri KHushbu ke farq ne warna
main tere wahm mein tujh se lipaTne wala tha

usi ko chumta rahta tha wo ki us ko bhi
aziz tha wahi bazu jo kaTne wala tha

mujhi ko rah badalni thi so badal Dali
kahin pahaD bhi Thokar se haTne wala tha

talash jis ki thi wo harf mil gaya warna
main ek sada waraq aur ulaTne wala tha

ye kis ko tir chalane ka shauq jag uTha
wo baz meri taraf hi jhapaTne wala tha