Subscribe to our newsletter and get our newest updates

Hakeem Nasir

  • Ghazal


zindagi ko na bana len wo saza mere baad


zindagī ko na banā leñ vo sazā mere baad
hausla denā unheñ mere ḳhudā mere baad

kaun ghūñghaT ko uThā.egā sitamgar kah ke
aur phir kis se kareñge vo hayā mere baad

phir mohabbat kī zamāne meñ na pursish hogī
ro.egī siskiyāñ le le ke vafā mere baad

haath uThte hue un ke na koī dekhegā
kis ke aane kī kareñge vo duā mere baad

kis qadar ġham hai unheñ mujh se bichhaḌ jaane kā
ho ga.e vo bhī zamāne se judā mere baad

vo jo kahtā thā ki 'nāsir' ke liye jiitā huuñ
us kā kyā jāniye kyā haal huā mere baad

zindagi ko na bana len wo saza mere baad
hausla dena unhen mere KHuda mere baad

kaun ghunghaT ko uThaega sitamgar kah ke
aur phir kis se karenge wo haya mere baad

phir mohabbat ki zamane mein na pursish hogi
roegi siskiyan le le ke wafa mere baad

hath uThte hue un ke na koi dekhega
kis ke aane ki karenge wo dua mere baad

kis qadar gham hai unhen mujh se bichhaD jaane ka
ho gae wo bhi zamane se juda mere baad

wo jo kahta tha ki 'nasir' ke liye jita hun
us ka kya jaaniye kya haal hua mere baad

Videos
This video is playing from YouTube Videos
This video is playing from YouTube Mehdi Hasan

Source: Book : Nuskha Hai Wafa (Pg. 259)

Leave a comment

+