ifshā hue asrār-e-junūñ jāma-darī se
chhāpe ga.e aḳhbār mirī be-ḳhabarī se

dam naak meñ aayā hai ab is nauhagarī se
dil pak gayā ai aah tirī be-asarī se

kyā din haiñ jo gul khilte haiñ sho.ale haiñ dahakte
lū chaltī hai bāġhoñ meñ nasīm-e-saharī se

sone ke nivāloñ se na kar parvarish-e-rūh
itnī bhī mohabbat nahīñ karte safarī se

kab ahl-e-duval se huī ma.abūd-parastī
bātil hai agar sajda kareñ tāj-e-zarī se

har haal meñ rahtī hai ḳhudā par nazar apnī
ye martaba hāsil hai hameñ be-hunarī se

maġhrūr na ho chāñd se ruḳhsār par apne
ye qumquma raushan hai charāġh-e-saharī se

tū vo hai shah-e-husn agar baaj talab ho
le huur se guldasta tabaq shāh-e-parī se

muñh chaḌhte haiñ bad-asl tamīz un ko nahīñ hai
dāñtoñ se laḌī silk-e-guhar bad-guharī se

āñkhoñ se nikalvāiye āñkheñ hirnoñ kī
chītoñ kī kamar toḌiye nāzuk-kamarī se

naubat to kahīñ qatl-e-gunāhgār kī aa.ī
naqqāre bajā.uñgā meñ tīroñ kī sarī se

pusht-e-lab-e-shaffāf se joban hai misoñ kā
sabze ne numū kī hai aqīq-e-shajarī se

piirī meñ bhī ham se na huī ḳhāna-nashīnī
baaz aa.e na bazmoñ se na guzre guzrī se

qad tiir sā talvār tavāzo.a se huā hai
vo haath uThāte nahīñ be-dād-garī se

jab chāho chale aao ye va.ada nahīñ achchhā
dil aañkh churātā hai bahut muntazarī se

ab zof-e-junūñ kūcha-e-jānāñ meñ bahā de
kab tak ye varam paañv par āshufta-sarī se

vo choT kaleje meñ lagī hai ki na pūchho
taḌpūñgā tah-e-ḳhāk bhī dard-e-jigarī se

rone kā na le naam ġham-e-yār meñ ai 'bahr'
ulTe na zamāne kā varaq lab kī tarī se

ifsha hue asrar-e-junun jama-dari se
chhape gae aKHbar meri be-KHabari se

dam nak mein aaya hai ab is nauhagari se
dil pak gaya ai aah teri be-asari se

kya din hain jo gul khilte hain shoale hain dahakte
lu chalti hai baghon mein nasim-e-sahari se

sone ke niwalon se na kar parwarish-e-ruh
itni bhi mohabbat nahin karte safari se

kab ahl-e-duwal se hui mabud-parasti
baatil hai agar sajda karen taj-e-zari se

har haal mein rahti hai KHuda par nazar apni
ye martaba hasil hai hamein be-hunari se

maghrur na ho chand se ruKHsar par apne
ye qumquma raushan hai charagh-e-sahari se

tu wo hai shah-e-husn agar baj talab ho
le hur se guldasta tabaq shah-e-pari se

munh chaDhte hain bad-asl tamiz un ko nahin hai
danton se laDi silk-e-guhar bad-guhari se

aankhon se nikalwaiye aankhen hirnon ki
chiton ki kamar toDiye nazuk-kamari se

naubat to kahin qatl-e-gunahgar ki aai
naqqare bajaunga mein tiron ki sari se

pusht-e-lab-e-shaffaf se joban hai mison ka
sabze ne numu ki hai aqiq-e-shajari se

piri mein bhi hum se na hui KHana-nashini
baz aae na bazmon se na guzre guzri se

qad tir sa talwar tawazoa se hua hai
wo hath uThate nahin be-dad-gari se

jab chaho chale aao ye wada nahin achchha
dil aankh churaata hai bahut muntazari se

ab zof-e-junun kucha-e-jaanan mein baha de
kab tak ye waram panw par aashufta-sari se

wo choT kaleje mein lagi hai ki na puchho
taDpunga tah-e-KHak bhi dard-e-jigari se

rone ka na le nam gham-e-yar mein ai 'bahr'
ulTe na zamane ka waraq lab ki tari se