Subscribe to our newsletter and get our newest updates

Nabeel Ahmad Nabeel

  • Ghazal


chur the log jo sangini-e-hijrat se yahan


chuur the log jo sañgīnī-e-hijrat se yahāñ
saañs bhī aatā nahīñ un ko suhulat se yahāñ

vo kisī phuul kisī ġhunche ke haqdār nahīñ
dasht gulzār banāte haiñ jo mehnat se yahāñ

choġhā pahnāyā gayā jhuuT kā sachchā.ī ko
aur ma.ānī liye nafrat ke mohabbat se yahāñ

ham ne buniyād rakhī zahr-bujhe sajdoñ kī
teġh kā kaam liyā ham ne ibādat se yahāñ

haath hālāt ne Daale haiñ garebānoñ meñ
zindagī kaise guzāre koī izzat se yahāñ

peT pe bāñdhā gayā sabr kā bhārī patthar
aur guzārā gayā har lamha mashaqqat se yahāñ

sāhab-e-mimbar-o-mehrāb bhī kyā bhūkā hai
peT kī aag bujhātā hai sharī.at se yahāñ

saañs chubhtā rahā kāñTe kī tarah dil meñ 'nabīl'
jism Dhalte rahe chhāloñ meñ aziyyat se yahāñ

chur the log jo sangini-e-hijrat se yahan
sans bhi aata nahin un ko suhulat se yahan

wo kisi phul kisi ghunche ke haqdar nahin
dasht gulzar banate hain jo mehnat se yahan

chogha pahnaya gaya jhuT ka sachchai ko
aur maani liye nafrat ke mohabbat se yahan

hum ne buniyaad rakhi zahr-bujhe sajdon ki
tegh ka kaam liya hum ne ibaadat se yahan

hath haalat ne Dale hain garebanon mein
zindagi kaise guzare koi izzat se yahan

peT pe bandha gaya sabr ka bhaari patthar
aur guzara gaya har lamha mashaqqat se yahan

sahab-e-mimbar-o-mehrab bhi kya bhuka hai
peT ki aag bujhata hai shariat se yahan

sans chubhta raha kanTe ki tarah dil mein 'nabil'
jism Dhalte rahe chhaalon mein aziyyat se yahan


Leave a comment

+