jo lamhe TuuT chuke un ko joḌte kyuuñ ho
ye juḌ ga.e to unheñ phir se toḌte kyuuñ ho

mizāj-e-shams badal jā.egā to kyā hogā
jo zarre so.e haiñ un ko jhiñjhoḌte kyuuñ ho

kab āñsuoñ se miTā hai shigāf-e-ā.īna
jo shīsha TuuT chukā us ko joḌte kyuuñ ho

ye ret hai yahāñ miT jā.eñge tamām nuqūsh
tum apnā naqsh-e-qadam us pe chhoḌte kyuuñ ho

tumhārī samt zamāna bil-āḳhir aa.egā
tum apnī fikr kī samtoñ ko moḌte kyuuñ ho

tumhārī āñkhoñ ne baḳhshī hai gul ko namkīnī
tum apnī āñkhoñ meñ jalve nichoḌte kyuuñ ho

'karāmat' aise meñ sāñsoñ kā haal kyā hogā
sisakte lamhoñ kī gardan maroḌte kyuuñ ho

jo lamhe TuT chuke un ko joDte kyun ho
ye juD gae to unhen phir se toDte kyun ho

mizaj-e-shams badal jaega to kya hoga
jo zarre soe hain un ko jhinjhoDte kyun ho

kab aansuon se miTa hai shigaf-e-aina
jo shisha TuT chuka us ko joDte kyun ho

ye ret hai yahan miT jaenge tamam nuqush
tum apna naqsh-e-qadam us pe chhoDte kyun ho

tumhaari samt zamana bil-aKHir aaega
tum apni fikr ki samton ko moDte kyun ho

tumhaari aankhon ne baKHshi hai gul ko namkini
tum apni aankhon mein jalwe nichoDte kyun ho

'karamat' aise mein sanson ka haal kya hoga
sisakte lamhon ki gardan maroDte kyun ho