Subscribe to our newsletter and get our newest updates

Fahmi Badayuni

  • Ghazal


nahin ho tum to aisa lag raha hai


nahīñ ho tum to aisā lag rahā hai
ki jaise shahr meñ curfew lagā hai

mire saa.e meñ us kā naqsh-e-pā hai
baḌā ehsān mujh par dhuup kā hai

koī barbād ho kar jā chukā hai
koī barbād honā chāhtā hai

lahū āñkhoñ meñ aa kar chhup gayā hai
na jaane shahr-e-dil meñ kyā huā hai

kaTī hai umr bas ye sochne meñ
mire baare meñ vo kyā sochtā hai

barā.e naam haiñ un se marāsim
barā.e naam jiinā paḌ rahā hai

sitāre jagmagāte jā rahe haiñ
ḳhudā apnā qasīda likh rahā hai

guloñ kī bāteñ chhup kar sun rahā huuñ
tumhārā zikr achchhā lag rahā hai

nahin ho tum to aisa lag raha hai
ki jaise shahr mein curfew laga hai

mere sae mein us ka naqsh-e-pa hai
baDa ehsan mujh par dhup ka hai

koi barbaad ho kar ja chuka hai
koi barbaad hona chahta hai

lahu aankhon mein aa kar chhup gaya hai
na jaane shahr-e-dil mein kya hua hai

kaTi hai umr bas ye sochne mein
mere bare mein wo kya sochta hai

barae nam hain un se marasim
barae nam jina paD raha hai

sitare jagmagate ja rahe hain
KHuda apna qasida likh raha hai

gulon ki baaten chhup kar sun raha hun
tumhaara zikr achchha lag raha hai


Leave a comment

+