Subscribe to our newsletter and get our newest updates

Jalal Lakhnavi

  • Ghazal


muddat ke baad munh se lagi hai jo chhuT kar


muddat ke ba.ad muñh se lagī hai jo chhūT kar
to ye bhī mai pe girtī hai kyā TuuT TuuT kar

mehñdī thā merā ḳhuun ki hotā jo rā.egāñ
ik shab ke ba.ad haath se qātil ke chhūT kar

pahlā hī din thā ham ko kiye tark-e-mai-kashī
kyā kyā paḌā hai raat ko meñh TuuT TuuT kar

sabr o qarār le ke diyā dāġh-e-ārzū
ābād tum ne dil ko kiyā mujh ko luuT kar

hairat hai mere aḳhtar-e-baḳht-e-siyāh ko
kyuuñ kar gahan se chāñd nikaltā hai chhūT kar

allāh-re āñsuoñ kā khaTaknā firāq meñ
āñkhoñ meñ bhar gayā koī almās kuuT kar

Tapke nahīñ qalam ke faqat ashk naama par
vo kuchh likhā ki roī siyāhī bhī phuuT kar

kar band-o-bast abhī se na gulshan meñ bāġhbāñ
vo din to ho ki murġh-e-qafas aa.eñ chhūT kar

sad-haif sar-guzisht jo apnī kahī 'jalāl'
tū is ko dāstān samajh sach ko jhuuT kar

muddat ke baad munh se lagi hai jo chhuT kar
to ye bhi mai pe girti hai kya TuT TuT kar

mehndi tha mera KHun ki hota jo raegan
ek shab ke baad hath se qatil ke chhuT kar

pahla hi din tha hum ko kiye tark-e-mai-kashi
kya kya paDa hai raat ko meinh TuT TuT kar

sabr o qarar le ke diya dagh-e-arzu
aabaad tum ne dil ko kiya mujh ko luT kar

hairat hai mere aKHtar-e-baKHt-e-siyah ko
kyun kar gahan se chand nikalta hai chhuT kar

allah-re aansuon ka khaTakna firaq mein
aankhon mein bhar gaya koi almas kuT kar

Tapke nahin qalam ke faqat ashk nama par
wo kuchh likha ki roi siyahi bhi phuT kar

kar band-o-bast abhi se na gulshan mein baghban
wo din to ho ki murgh-e-qafas aaen chhuT kar

sad-haif sar-guzisht jo apni kahi 'jalal'
tu is ko dastan samajh sach ko jhuT kar


Source: Book : Nawa-e-harf-e-khamoosh (Pg. 191) Author : Zafar Kaleem Publication : Zafar Kaleem (2007) Edition : 2007

Leave a comment

+