Subscribe to our newsletter and get our newest updates

Nabeel Ahmad Nabeel

  • Ghazal


hazar koshish-e-paiham ke bawajud hamein


hazār koshish-e-paiham ke bāvajūd hameñ
tamām umr koī dost bā-vafā na milā

kahāñ kā vasl mulāqāt hī ġhanīmat hai
phir us ke ba.ad vo ham se milā milā na milā

vo jis ko ham ne zamāne se baḌh ke chāhā thā
us ek shaḳhs kī chāhat meñ kuchh mazā na milā

tirī judā.ī ke sahrā meñ kho ga.e aise
surāġh apnā kahīñ aur kahīñ patā na milā

ye kā.enāt ki be-rañg hotī jaatī hai
jo dil kā rañg dikhātī vo aa.ina na milā

talāshte rahe kāñToñ meñ phuul se paikar
mizāj ham ko azal se hī āshiqāna milā

tamām umr hī rastoñ kī ḳhaak chhānī hai
hameñ to manzil-e-hastī tirā patā na milā

hameñ jo raah dikhātā qadam qadam pe 'nabīl'
misāl-e-ḳhizr koī aisā rahnumā na milā

ḳhud aap apne muqābil meñ aa ga.e haiñ 'nabīl'
hameñ mizāj milā bhī to bāġhiyāna milā

hazar koshish-e-paiham ke bawajud hamein
tamam umr koi dost ba-wafa na mila

kahan ka wasl mulaqat hi ghanimat hai
phir us ke baad wo hum se mila mila na mila

wo jis ko hum ne zamane se baDh ke chaha tha
us ek shaKHs ki chahat mein kuchh maza na mila

teri judai ke sahra mein kho gae aise
suragh apna kahin aur kahin pata na mila

ye kaenat ki be-rang hoti jati hai
jo dil ka rang dikhati wo aaina na mila

talashte rahe kanTon mein phul se paikar
mizaj hum ko azal se hi aashiqana mila

tamam umr hi raston ki KHak chhani hai
hamein to manzil-e-hasti tera pata na mila

hamein jo rah dikhata qadam qadam pe 'nabil'
misal-e-KHizr koi aisa rahnuma na mila

KHud aap apne muqabil mein aa gae hain 'nabil'
hamein mizaj mila bhi to baghiyana mila


Leave a comment

+