Subscribe to our newsletter and get our newest updates

Talib Baghpati

  • Ghazal


irfan hai ye ishq ke soz-o-gudaz ka


irfān hai ye ishq ke soz-o-gudāz kā
parda uThā rahā hai koī imtiyāz kā

tāroñ se pūchhiye mirī āñkhoñ ko dekhiye
duniyā ko kyā pata shab-e-hijr-e-darāz kā

jaane se qabl tuur pe muusā ye dekhte
kyā zarf hai havās tajallī-navāz kā

sab surḳhiyāñ haiñ ḳhūn-e-vafā sī likhī huī
qissa hai dil-gudāz shahīd-e-niyāz kā

sar be-ḳhudī meñ aap ke qadmoñ pe jhuk gayā
aayā thā kuchh ḳhayāl sā dil meñ namāz kā

āñkheñ jhukā nazar na milā dil pe tiir khā
pahlā sabaq hai ishq ke rāz-o-niyāz kā

mahfil meñ dekhte haiñ vo tasvīr kī tarah
markaz hai har nafas nigah-e-imtiyāz kā

dekhā phir us ne qalb kī phir harkateñ baḌhīñ
zaḳhma banī hai phir nigah-e-nāz saaz kā

zarf āzmā.e sozish-e-sad-barq-e-tūr se
liije na imtihān dil-e-be-niyāz kā

'tālib' agar nazar na ho pāmāl-e-ḳhvāhishāt
har lam.a barq-e-tūr hai husn-e-majāz kā

irfan hai ye ishq ke soz-o-gudaz ka
parda uTha raha hai koi imtiyaz ka

taron se puchhiye meri aankhon ko dekhiye
duniya ko kya pata shab-e-hijr-e-daraaz ka

jaane se qabl tur pe musa ye dekhte
kya zarf hai hawas tajalli-nawaz ka

sab surKHiyan hain KHun-e-wafa si likhi hui
qissa hai dil-gudaz shahid-e-niyaz ka

sar be-KHudi mein aap ke qadmon pe jhuk gaya
aaya tha kuchh KHayal sa dil mein namaz ka

aankhen jhuka nazar na mila dil pe tir kha
pahla sabaq hai ishq ke raaz-o-niyaz ka

mahfil mein dekhte hain wo taswir ki tarah
markaz hai har nafas nigah-e-imtiyaz ka

dekha phir us ne qalb ki phir harkaten baDhin
zaKHma bani hai phir nigah-e-naz saz ka

zarf aazmae sozish-e-sad-barq-e-tur se
lije na imtihan dil-e-be-niyaz ka

'talib' agar nazar na ho pamal-e-KHwahishat
har lama barq-e-tur hai husn-e-majaz ka


Source: Book : Kalam-e-aizaz afzal (Pg. 183) Author : Aizaz Afzal Publication : Usmania Book Depot

Leave a comment

+