Subscribe to our newsletter and get our newest updates

Wahshat Raza Ali Kalkatvi

  • Ghazal


tu hai aur aish hai aur anjuman-arai hai


tū hai aur aish hai aur anjuman-ārā.ī hai
maiñ huuñ aur ranj hai aur gosha-e-tanhā.ī hai

sach kahā hai ki ba-ummīd hai duniyā qaa.im
dil-e-hasrat-zada bhī terā tamannā.ī hai

dil kī fariyād jo suntā huuñ to ro detā huuñ
choT kambaḳht ne kuchh aisī hī to khaa.ī hai

be-niyāzī kī adā.eñ vo dikhāte haiñ bahut
ḳhū-e-taslīm mirī un ko pasand aa.ī hai

zulf barham mizha bargashta jabīñ chīn-ālūd
merī bigḌī huī taqdīr kī ban aa.ī hai

adab-āmoz balā kā hai taġhāful un kā
shauq-e-pur-hauslā ne ḳhuub sazā paa.ī hai

kahe detā huuñ kisī aur kī jānib tū na dekh
kyā ye kuchh kam hai ki 'vahshat' tirā saudā.ī hai

tu hai aur aish hai aur anjuman-arai hai
main hun aur ranj hai aur gosha-e-tanhai hai

sach kaha hai ki ba-ummid hai duniya qaim
dil-e-hasrat-zada bhi tera tamannai hai

dil ki fariyaad jo sunta hun to ro deta hun
choT kambaKHt ne kuchh aisi hi to khai hai

be-niyazi ki adaen wo dikhate hain bahut
KHu-e-taslim meri un ko pasand aai hai

zulf barham mizha bargashta jabin chin-alud
meri bigDi hui taqdir ki ban aai hai

adab-amoz bala ka hai taghaful un ka
shauq-e-pur-hausla ne KHub saza pai hai

kahe deta hun kisi aur ki jaanib tu na dekh
kya ye kuchh kam hai ki 'wahshat' tera saudai hai


Pachas Sala Intekhab"

Leave a comment

+