Subscribe to our newsletter and get our newest updates

Faizan Arif

  • Ghazal


kuchh ehtimam safar ka zarur karna hai


kuchh ehtimām safar kā zarūr karnā hai
ki us ke shahr se ho kar mujhe guzarnā hai

maiñ chup nahīñ huuñ kisī maslahat ke pesh-e-nazar
maiñ jāntā huuñ kahāñ iḳhtilāf karnā hai

hamāre jism se patthar bañdhe hue haiñ magar
samundaroñ kī tahoñ se hameñ ubharnā hai

phisal rahī hai javānī kī ret muTThī se
guzar rahe haiñ mire din inheñ guzarnā hai

ye kā.enāt kī tasvīr nā-mukammal hai
abhī to is meñ bahut rañg us ne bharnā hai

mirā mizāj nahīñ hai magar mujhe 'faizān'
kisī ke vāste ik ahd se mukarnā hai

kuchh ehtimam safar ka zarur karna hai
ki us ke shahr se ho kar mujhe guzarna hai

main chup nahin hun kisi maslahat ke pesh-e-nazar
main jaanta hun kahan iKHtilaf karna hai

hamare jism se patthar bandhe hue hain magar
samundaron ki tahon se hamein ubharna hai

phisal rahi hai jawani ki ret muTThi se
guzar rahe hain mere din inhen guzarna hai

ye kaenat ki taswir na-mukammal hai
abhi to is mein bahut rang us ne bharna hai

mera mizaj nahin hai magar mujhe 'faizan'
kisi ke waste ek ahd se mukarna hai


Leave a comment

+