Subscribe to our newsletter and get our newest updates

Zafar Tabish

  • Ghazal


basti basti jangal jangal ghuma main


bastī bastī jañgal jañgal ghūmā maiñ
lekin apne ghar meñ aa kar soyā maiñ

jab bhī thakan mahsūs huī hai raste kī
būḌhe-bargad ke saa.e meñ baiThā maiñ

kyā dekhā thā āḳhir merī āñkhoñ ne
chalte chalte raste meñ kyuuñ Thahrā maiñ

jab bhī jhuk kar miltā huuñ maiñ logoñ se
ho jaatā huuñ apne qad se ūñchā maiñ

ThanDe mausam se bhī maiñ jal jaatā huuñ
sūkhī bārish meñ bhī aksar bhīgā maiñ

jab jab bachche būḌhī bāteñ karte haiñ
yuuñ lagtā hai dekh rahā huuñ sapnā maiñ

saare manzar suune suune lagte haiñ
kaisī bastī meñ 'tābish' aa pahuñchā maiñ

basti basti jangal jangal ghuma main
lekin apne ghar mein aa kar soya main

jab bhi thakan mahsus hui hai raste ki
buDhe-bargad ke sae mein baiTha main

kya dekha tha aaKHir meri aankhon ne
chalte chalte raste mein kyun Thahra main

jab bhi jhuk kar milta hun main logon se
ho jata hun apne qad se uncha main

ThanDe mausam se bhi main jal jata hun
sukhi barish mein bhi aksar bhiga main

jab jab bachche buDhi baaten karte hain
yun lagta hai dekh raha hun sapna main

sare manzar sune sune lagte hain
kaisi basti mein 'tabish' aa pahuncha main


Leave a comment

+