zālim se mustafā kā amal chāhte haiñ log
sūkhe hue daraḳht se phal chāhte haiñ log

kaafī hai jin ke vāste chhoTā sā ik makāñ
pūchhe koī to shīsh-mahal chāhte haiñ log

saa.e kī māñgte haiñ ridā āftāb se
patthar se aa.ine kā badal chāhte haiñ log

kab tak kisī kī zulf-e-pareshāñ kā tazkira
kuchh apnī uljhanoñ kā bhī hal chāhte haiñ log

bār-e-ġham-e-hayāt se shāne hue haiñ shal
uktā ke zindagī se ajal chāhte haiñ log

rakhte nahīñ nigāh taqāzoñ pe vaqt ke
tālāb ke baġhair kañval chāhte haiñ log

jis ko bhī dekhiye hai vahī dushman-e-sukūñ
kyā daur hai ki jañg-o-jadal chāhte haiñ log

darkār hai najāt ġham-e-rozgār se
mirrīḳh chāhte haiñ na zuhal chāhte haiñ log

'ejāz' apne ahd kā maiñ tarjumān huuñ
maiñ jāntā huuñ jaisī ġhazal chāhte haiñ log

zalim se mustafa ka amal chahte hain log
sukhe hue daraKHt se phal chahte hain log

kafi hai jin ke waste chhoTa sa ek makan
puchhe koi to shish-mahal chahte hain log

sae ki mangte hain rida aaftab se
patthar se aaine ka badal chahte hain log

kab tak kisi ki zulf-e-pareshan ka tazkira
kuchh apni uljhanon ka bhi hal chahte hain log

bar-e-gham-e-hayat se shane hue hain shal
ukta ke zindagi se ajal chahte hain log

rakhte nahin nigah taqazon pe waqt ke
talab ke baghair kanwal chahte hain log

jis ko bhi dekhiye hai wahi dushman-e-sukun
kya daur hai ki jang-o-jadal chahte hain log

darkar hai najat gham-e-rozgar se
mirriKH chahte hain na zuhal chahte hain log

'ejaz' apne ahd ka main tarjuman hun
main jaanta hun jaisi ghazal chahte hain log

Source: NaqsháShumara No. 010â