Subscribe to our newsletter and get our newest updates

Ghulam Mohammad Qasir

  • Ghazal


kahin log tanha kahin ghar akele


kahīñ log tanhā kahīñ ghar akele
kahāñ tak maiñ dekhūñ ye manzar akele

galī meñ havāoñ kī sargoshiyāñ haiñ
gharoñ meñ magar sab sanobar akele

numā.ish hazāroñ nigāhoñ ne dekhī
magar phuul pahle se baḌh kar akele

ab ik tiir bhī ho liyā saath varna
parinda chalā thā safar par akele

jo dekho to ik lahar meñ jā rahe haiñ
jo socho to saare shanāvar akele

tirī yaad kī barf-bārī kā mausam
sulagtā rahā dil ke andar akele

irāda thā jī lūñgā tujh se bichhaḌ kar
guzartā nahīñ ik december akele

zamāne se 'qāsir' ḳhafā to nahīñ haiñ
ki dekhe ga.e haiñ vo aksar akele

kahin log tanha kahin ghar akele
kahan tak main dekhun ye manzar akele

gali mein hawaon ki sargoshiyan hain
gharon mein magar sab sanobar akele

numaish hazaron nigahon ne dekhi
magar phul pahle se baDh kar akele

ab ek tir bhi ho liya sath warna
parinda chala tha safar par akele

jo dekho to ek lahar mein ja rahe hain
jo socho to sare shanawar akele

teri yaad ki barf-bari ka mausam
sulagta raha dil ke andar akele

irada tha ji lunga tujh se bichhaD kar
guzarta nahin ek december akele

zamane se 'qasir' KHafa to nahin hain
ki dekhe gae hain wo aksar akele


Source:

Leave a comment

+