andāz-e-fikr ahl-e-jahāñ kā judā rahā
vo mujh se ḳhush rahe to zamāna ḳhafā rahā

aalam hayāt kā na kabhī ek sā rahā
duniyā meñ zindagī kā tamāshā banā rahā

thā har qadam pe apne azā.em kā imtihāñ
har gaam hādsāt kā mahshar bapā rahā

phūloñ kī ahd gul meñ tijārat to ḳhuub kī
pūchhe koī ki dāman-e-gulchīñ meñ kyā rahā

bār-e-garāñ thā mere liye arsa-e-hayāt
jiine kā tere ġham se bahut hausla rahā

har fikr har amal kā hai niyyat pe inhisār
shaiḳh-e-haram bhī banda-e-hirs-o-havā rahā

duniyā amal kī raah meñ aage nikal ga.ī
zāhid to ḳhānqāh meñ mahv-e-duā rahā

ham laakh muskurā.e tabassum kī oT se
soz-e-ġham-e-hayāt magar jhāñktā rahā

'ejāz' ahl-e-jaur se nafrat rahī unheñ
har zulm un kī bazm meñ lekin ravā rahā

andaz-e-fikr ahl-e-jahan ka juda raha
wo mujh se KHush rahe to zamana KHafa raha

aalam hayat ka na kabhi ek sa raha
duniya mein zindagi ka tamasha bana raha

tha har qadam pe apne azaem ka imtihan
har gam hadsat ka mahshar bapa raha

phulon ki ahd gul mein tijarat to KHub ki
puchhe koi ki daman-e-gulchin mein kya raha

bar-e-garan tha mere liye arsa-e-hayat
jine ka tere gham se bahut hausla raha

har fikr har amal ka hai niyyat pe inhisar
shaiKH-e-haram bhi banda-e-hirs-o-hawa raha

duniya amal ki rah mein aage nikal gai
zahid to KHanqah mein mahw-e-dua raha

hum lakh muskurae tabassum ki oT se
soz-e-gham-e-hayat magar jhankta raha

'ejaz' ahl-e-jaur se nafrat rahi unhen
har zulm un ki bazm mein lekin rawa raha

Pachas Sala Intekhab"