Subscribe to our newsletter and get our newest updates

Abdul Ghafoor Nassakh

  • Ghazal


naqsh-e-dil hai sitam judai ka


naqsh-e-dil hai sitam judā.ī kā
shauq phir kis ko āshnā.ī kā

chakhte haiñ ab mazā judā.ī kā
ye natīja hai āshnā.ī kā

un ke dil kī kudūrat aur baḌhī
zikr kījiye agar safā.ī kā

dekh to sañg-e-āstāñ pe tire
hai nishāñ kis kī jab.ha-sā.ī kā

tere dar kā gadā jo hai ai dost
aish kartā hai bādshā.ī kā

duḳhtar-e-raz ne kar diyā bātil
mujh ko daavā thā pārsā.ī kā

karte haiñ ahl-e-āsmāñ charchā
mere nāloñ kī nā-rasā.ī kā

kaaT Daalo agar zabāñ pe mire
harf aayā ho āshnā.ī kā

kar ke sadqe na chhoḌ deñ 'nassāḳh'
dil ko dhaḌkā hai kyuuñ rihā.ī kā

naqsh-e-dil hai sitam judai ka
shauq phir kis ko aashnai ka

chakhte hain ab maza judai ka
ye natija hai aashnai ka

un ke dil ki kudurat aur baDhi
zikr kijiye agar safai ka

dekh to sang-e-astan pe tere
hai nishan kis ki jabha-sai ka

tere dar ka gada jo hai ai dost
aish karta hai baadshai ka

duKHtar-e-raz ne kar diya baatil
mujh ko dawa tha parsai ka

karte hain ahl-e-asman charcha
mere nalon ki na-rasai ka

kaT Dalo agar zaban pe mere
harf aaya ho aashnai ka

kar ke sadqe na chhoD den 'nassaKH'
dil ko dhaDka hai kyun rihai ka

RECITATIONS Nomaan Shauque



00:00/00:00 naqsh-e-dil hai sitam judai ka Nomaan Shauque

Pachas Sala Intekhab"

Leave a comment

+