Subscribe to our newsletter and get our newest updates

Hafeez Jalandhari

  • Ghazal


dil-e-be-muddaa hai aur main hun


dil-e-be-mudda.ā hai aur maiñ huuñ
magar lab par duā hai aur maiñ huuñ

na saaqī hai na ab vo shai hai baaqī
mirā daur aa gayā hai aur maiñ huuñ

udhar duniyā hai aur duniyā ke bande
idhar merā ḳhudā hai aur maiñ huuñ

koī pursāñ nahīñ pīr-e-muġhāñ kā
faqat merī vafā hai aur maiñ huuñ

abhī mī.ād baaqī hai sitam kī
mohabbat kī sazā hai aur maiñ huuñ

na pūchho haal merā kuchh na pūchho
ki taslīm o razā hai aur maiñ huuñ

ye tūl-e-umr nā-māqūl o be-kaif
buzurgoñ kī duā hai aur maiñ huuñ

lahū ke ghūñT piinā aur jiinā
musalsal ik mazā hai aur maiñ huuñ

'hafīz' aisī falākat ke dinoñ meñ
faqat shukr-e-ḳhudā hai aur maiñ huuñ

dil-e-be-muddaa hai aur main hun
magar lab par dua hai aur main hun

na saqi hai na ab wo shai hai baqi
mera daur aa gaya hai aur main hun

udhar duniya hai aur duniya ke bande
idhar mera KHuda hai aur main hun

koi pursan nahin pir-e-mughan ka
faqat meri wafa hai aur main hun

abhi miad baqi hai sitam ki
mohabbat ki saza hai aur main hun

na puchho haal mera kuchh na puchho
ki taslim o raza hai aur main hun

ye tul-e-umr na-maqul o be-kaif
buzurgon ki dua hai aur main hun

lahu ke ghunT pina aur jina
musalsal ek maza hai aur main hun

'hafiz' aisi falakat ke dinon mein
faqat shukr-e-KHuda hai aur main hun


Leave a comment

+