ā.īne meñ chehra rakh kar sochūñgā
maiñ ab ḳhud ko tanhā rakh kar sochūñgā

duur falak se ik din maiñ bhī ubharūñgā
phir Thokar meñ duniyā rakh kar sochūñgā

kis manzil se merā rishta gahrā hai
paañv tale har rasta rakh kar sochūñgā

merā juzv bhī jaise kul meñ shāmil ho
dariyā meñ ek qatra rakh kar sochūñgā

yaksāñ qadreñ 'ḳhusrav' se 'farhān' talak
saare lahje yakjā rakh kar sochūñgā

aaine mein chehra rakh kar sochunga
main ab KHud ko tanha rakh kar sochunga

dur falak se ek din main bhi ubharunga
phir Thokar mein duniya rakh kar sochunga

kis manzil se mera rishta gahra hai
panw tale har rasta rakh kar sochunga

mera juzw bhi jaise kul mein shamil ho
dariya mein ek qatra rakh kar sochunga

yaksan qadren 'KHusraw' se 'farhan' talak
sare lahje yakja rakh kar sochunga