jafā.eñ hotī haiñ ghuTtā hai dam aisā bhī hotā hai
magar ham par jo hai terā sitam aisā bhī hotā hai

adū ke aate hī raunaq sidhārī terī mahfil kī
ma.āz-allāh insāñ kā qadam aisā bhī hotā hai

rukāvaT hai ḳhalish hai chheḌ hai iizā pe iizā hai
sitam ahl-e-vafā par dam-ba-dam aisā bhī hotā hai

hasīnoñ kī jafā.eñ bhī talavvun se nahīñ ḳhālī
sitam ke ba.ad karte haiñ karam aisā bhī hotā hai

dil-e-mahjūr āḳhir intihā hai har nahūsat kī
kabhī sa.aden hote haiñ baham aisā bhī hotā hai

na kar shikva hamārī be-sabab kī bad-gumānī kā
mohabbat meñ tire sar kī qasam aisā bhī hotā hai

na ho dard-e-judā.ī se jo vāqif us ko kyā kahiye
hameñ vo dekh kar kahte haiñ ġham aisā bhī hotā hai

butoñ ke milne-julne par na jaanā ai dil-e-nādāñ
baḌhā kar rabt kar dete haiñ kam aisā bhī hotā hai

hameñ bazm-e-adū meñ vo bulāte haiñ tamannā se
karam aisā bhī hotā hai sitam aisā bhī hotā hai

jagah dī mujh ko ka.abe meñ ḳhudā-e-pāk ne zāhid
tū kahtā thā ki maqbūl-e-haram aisā bhī hotā hai

huā kartā hai sab kuchh ai 'asar' us kī ḳhudā.ī meñ
kareñ da.avā ḳhudā.ī kā sanam aisā bhī hotā hai

jafaen hoti hain ghuTta hai dam aisa bhi hota hai
magar hum par jo hai tera sitam aisa bhi hota hai

adu ke aate hi raunaq sidhaari teri mahfil ki
maaz-allah insan ka qadam aisa bhi hota hai

rukawaT hai KHalish hai chheD hai iza pe iza hai
sitam ahl-e-wafa par dam-ba-dam aisa bhi hota hai

hasinon ki jafaen bhi talawwun se nahin KHali
sitam ke baad karte hain karam aisa bhi hota hai

dil-e-mahjur aaKHir intiha hai har nahusat ki
kabhi saden hote hain baham aisa bhi hota hai

na kar shikwa hamari be-sabab ki bad-gumani ka
mohabbat mein tere sar ki qasam aisa bhi hota hai

na ho dard-e-judai se jo waqif us ko kya kahiye
hamein wo dekh kar kahte hain gham aisa bhi hota hai

buton ke milne-julne par na jaana ai dil-e-nadan
baDha kar rabt kar dete hain kam aisa bhi hota hai

hamein bazm-e-adu mein wo bulate hain tamanna se
karam aisa bhi hota hai sitam aisa bhi hota hai

jagah di mujh ko kabe mein KHuda-e-pak ne zahid
tu kahta tha ki maqbul-e-haram aisa bhi hota hai

hua karta hai sab kuchh ai 'asar' us ki KHudai mein
karen dawa KHudai ka sanam aisa bhi hota hai

Source: Book : Kulliyat-e-Mahshar Badayuni (Pg. 229)