ḳhush-fahmiyoñ ko ġhaur kā yaarā nahīñ rahā
tūfāñ kī zad se duur kinārā nahīñ rahā

baḌh baḌh ke DhūñDhte haiñ panāheñ na.ī na.ī
fitnoñ ko tīrgī kā sahārā nahīñ rahā

biitā bayāñ bahā-e-tamannā baḌhā ga.iiñ
naqd-e-sukūñ gañvā ke ḳhasārā nahīñ rahā

baaqī thā jis ke dam se bharam ehtiyāj kā
himmat ko vo karam bhī gavārā nahīñ rahā

nāzāñ hai apnī fat.h pe is tarah maut aaj
jaise koī hayāt kā maarā nahīñ rahā

ḳhurshīd inqalāb kā ā.īna ho to ho
mizhgāñ se gir ke ashk sitārā nahīñ rahā

'yāqūb' lamhe lamhe se zāhir hai be-ruḳhī
sāhil-navāz vaqt kā dhārā nahīñ rahā

KHush-fahmiyon ko ghaur ka yara nahin raha
tufan ki zad se dur kinara nahin raha

baDh baDh ke DhunDhte hain panahen nai nai
fitnon ko tirgi ka sahaara nahin raha

bita bayan baha-e-tamanna baDha gain
naqd-e-sukun ganwa ke KHasara nahin raha

baqi tha jis ke dam se bharam ehtiyaj ka
himmat ko wo karam bhi gawara nahin raha

nazan hai apni fath pe is tarah maut aaj
jaise koi hayat ka mara nahin raha

KHurshid inqalab ka aaina ho to ho
mizhgan se gir ke ashk sitara nahin raha

'yaqub' lamhe lamhe se zahir hai be-ruKHi
sahil-nawaz waqt ka dhaara nahin raha

Source: Book : jadeed urdu gazal (Pg. 220)