Subscribe to our newsletter and get our newest updates

Nabeel Ahmad Nabeel

  • Ghazal


dil dhaDkanon mein jaise dhaDakta usi ka tha


dil dhaḌkanoñ meñ jaise dhaḌaktā usī kā thā
jaise mire vajūd pe chehra usī kā thā

rakhā huā thā jis ko zamāne se duur duur
har lab pe us kā tazkira charchā usī kā thā

aane diyā na chain kabhī ek pal mujhe
mere tasavvurāt meñ dhaḌkā usī kā thā

jis ne tamām shahr khañDar meñ badal diyā
sikka tamām shahr meñ chaltā usī kā thā

yuuñ to hazār zaḳhm mujhe aur bhī lage
lekin jo zaḳhm sab se thā gahrā usī kā thā

shiddat kī pyaas ne mujhe gherā to ye khulā
sahrā kā jo makīn thā dariyā usī kā thā

ham ko hai aaj tak usī ta.abīr kī talab
aayā thā kal 'nabīl' jo sapnā usī kā thā

raushan thā jis charāġh kī lau se badan 'nabīl'
mujh ko tamām-umr hī dhaḌkā usī kā thā

dil dhaDkanon mein jaise dhaDakta usi ka tha
jaise mere wajud pe chehra usi ka tha

rakha hua tha jis ko zamane se dur dur
har lab pe us ka tazkira charcha usi ka tha

aane diya na chain kabhi ek pal mujhe
mere tasawwuraat mein dhaDka usi ka tha

jis ne tamam shahr khanDar mein badal diya
sikka tamam shahr mein chalta usi ka tha

yun to hazar zaKHm mujhe aur bhi lage
lekin jo zaKHm sab se tha gahra usi ka tha

shiddat ki pyas ne mujhe ghera to ye khula
sahra ka jo makin tha dariya usi ka tha

hum ko hai aaj tak usi tabir ki talab
aaya tha kal 'nabil' jo sapna usi ka tha

raushan tha jis charagh ki lau se badan 'nabil'
mujh ko tamam-umr hi dhaDka usi ka tha


Leave a comment

+