Subscribe to our newsletter and get our newest updates

Zafar Taban

  • Ghazal


umr-e-abad ka ma-hasal ishq ka daur-e-na-tamam


umr-e-abad kā mā-hasal ishq kā daur-e-nā-tamām
haa.e vo mastī-e-sahar haa.e vo be-ḳhudī-e-shām

pahle ma.aal soch leñ ham-safarān-e-sust-gām
merī sarisht meñ nahīñ ḳhvāhish-e-manzil-o-maqām

tā.ir-e-ḳhasta-bāl ko daam bhī kunj-e-āshiyāñ
murġh-e-chaman-navard ko gosha-e-āshiyāñ bhī daam

ab bhī ḳhudā-parast hai dair-o-haram kī qaid meñ
haa.e nigāh-e-nā-rasā haa.e mazāq-e-nā-tamām

kaif-e-nazar kī mastiyāñ ahl-e-nazar se pūchhiye
jaise koī pilā gayā bāda-e-mushk-bū ke jaam

ḳhūbī-o-shān-e-dil-barī ġhamza-e-nāz hī nahīñ
husn meñ vo adā bhī hai jis kā nahīñ hai koī naam

umr-e-abad ka ma-hasal ishq ka daur-e-na-tamam
hae wo masti-e-sahar hae wo be-KHudi-e-sham

pahle maal soch len ham-safaran-e-sust-gam
meri sarisht mein nahin KHwahish-e-manzil-o-maqam

tair-e-KHasta-baal ko dam bhi kunj-e-ashiyan
murgh-e-chaman-naward ko gosha-e-ashiyan bhi dam

ab bhi KHuda-parast hai dair-o-haram ki qaid mein
hae nigah-e-na-rasa hae mazaq-e-na-tamam

kaif-e-nazar ki mastiyan ahl-e-nazar se puchhiye
jaise koi pila gaya baada-e-mushk-bu ke jam

KHubi-o-shan-e-dil-bari ghamza-e-naz hi nahin
husn mein wo ada bhi hai jis ka nahin hai koi nam


Source: Barg-e-Zard

Leave a comment

+