Subscribe to our newsletter and get our newest updates

Taban Abdul Hai

  • Ghazal


aarzu hai main rakhun tere qadam par gar jabin


aarzū hai maiñ rakhūñ tere qadam par gar jabīñ
tū uThāve naaz se zālim lagā Thokar jabīñ

apne ghar meñ to bahut paTkā pa kuchh hāsil nahīñ
ab ke jī meñ hai tirī chaukhaT pe ro.uuñ dhar jabīñ

jaisī peshānī tirī hai ai mire ḳhurshīd-rū
chāñd kī hai raushnī meñ us se kab behtar jabīñ

shaiḳh aa jalva ḳhudā kā mai-kade meñ hai mire
kyuuñ ragaḌtā hai abas ka.abe ke tū dar par jabīñ

kyā karūñ tere qadam tak to nahīñ hai dastaras
naqsh-e-pā hī par tire maltā huuñ maiñ akasr jabīñ

shaiḳh gar shaitān se sūrat nahīñ miltī tirī
bas batā dāġhī huī hai kis tarah yaksar jabīñ

hai kisī kī bhī tirī se auñdhī peshānī bhalā
dekh tū ai shoḳh apnī aa.ina le kar jabīñ

aa ke jin hāthoñ se maltā thā tire talvoñ ke ta.iiñ
pīTtā huuñ ab unhīñ hāthoñ se maiñ akasr jabīñ

buujh kar naqsh-e-qadam ko tere mehrāb-e-duā
māñgtā huuñ maiñ murād-e-dil ko rakh is par jabīñ

chāñd kā mukhḌā hai yā ā.īna yā mus.haf kā lauh
yā tirī hai ai mire rashk-e-mah-o-aḳhtar jabīñ

saaf dil 'tābāñ' mukaddar hī kabhū hotā nahīñ
ā.īna kī haigī raushan dekh le yaksar jabīñ

aarzu hai main rakhun tere qadam par gar jabin
tu uThawe naz se zalim laga Thokar jabin

apne ghar mein to bahut paTka pa kuchh hasil nahin
ab ke ji mein hai teri chaukhaT pe roun dhar jabin

jaisi peshani teri hai ai mere KHurshid-ru
chand ki hai raushni mein us se kab behtar jabin

shaiKH aa jalwa KHuda ka mai-kade mein hai mere
kyun ragaDta hai abas kabe ke tu dar par jabin

kya karun tere qadam tak to nahin hai dastaras
naqsh-e-pa hi par tere malta hun main akasr jabin

shaiKH gar shaitan se surat nahin milti teri
bas bata daghi hui hai kis tarah yaksar jabin

hai kisi ki bhi teri se aundhi peshani bhala
dekh tu ai shoKH apni aaina le kar jabin

aa ke jin hathon se malta tha tere talwon ke tain
piTta hun ab unhin hathon se main akasr jabin

bujh kar naqsh-e-qadam ko tere mehrab-e-dua
mangta hun main murad-e-dil ko rakh is par jabin

chand ka mukhDa hai ya aaina ya mushaf ka lauh
ya teri hai ai mere rashk-e-mah-o-aKHtar jabin

saf dil 'taban' mukaddar hi kabhu hota nahin
aaina ki haigi raushan dekh le yaksar jabin


Leave a comment

+