Subscribe to our newsletter and get our newest updates

Ibn e Insha

  • Ghazal


dil kis ke tasawwur mein jaane raaton ko pareshan hota hai


dil kis ke tasavvur meñ jaane rātoñ ko pareshāñ hotā hai
ye husn-e-talab kī baat nahīñ hotā hai mirī jaañ hotā hai

ham terī sikhā.ī mantiq se apne ko to samjhā lete haiñ
ik ḳhaar khaTaktā rahtā hai siine meñ jo pinhāñ hotā hai

phir un kī galī meñ pahuñchegā phir sahv kā sajda kar legā
is dil pe bharosā kaun kare har roz musalmāñ hotā hai

vo dard ki us ne chhīn liyā vo dard ki us kī baḳhshish thā
tanhā.ī kī rātoñ meñ 'inshā' ab bhī mirā mehmāñ hotā hai

dil kis ke tasawwur mein jaane raaton ko pareshan hota hai
ye husn-e-talab ki baat nahin hota hai meri jaan hota hai

hum teri sikhai mantiq se apne ko to samjha lete hain
ek KHar khaTakta rahta hai sine mein jo pinhan hota hai

phir un ki gali mein pahunchega phir sahw ka sajda kar lega
is dil pe bharosa kaun kare har roz musalman hota hai

wo dard ki us ne chhin liya wo dard ki us ki baKHshish tha
tanhai ki raaton mein 'insha' ab bhi mera mehman hota hai


Source: Funoon(Jadeed Ghazal Number: Volume-002)

Leave a comment

+