vo kaun hai duniyā meñ jo majbūr nahīñ hai
insāñ ko kisī baat kā maqdūr nahīñ hai

har shai pe tire husn kā jaadū hai azal se
kyā chiiz tire husn se mas.hūr nahīñ hai

mahkūm banā letā bashar arz-o-samā ko
lekin vo kare kyā use maqdūr nahīñ hai

duniyā meñ use aish-o-masarrat na mileñge
vo dil jo ġham-e-ishq se ranjūr nahīñ hai

maanā ki haqīqat ko samajhnā nahīñ āsāñ
insān haqīqat se magar duur nahīñ hai

hai sāhab-e-īmāñ kī kamī ahl-e-jahāñ meñ
ik raaz bhī varna tirā mastūr nahīñ hai

uTTho ki zamāne ko gunāhoñ se bachā.eñ
jo din hai qayāmat kā vo din duur nahīñ hai

kuchh kījiye a.amāl sañvar jaa.eñ jahāñ meñ
kuchh sochiye ab vaqt-e-qazā duur nahīñ hai

tūfān kī har mauj hai ik dars-e-haqīqat
sāhil pe pahuñchnā mujhe manzūr nahīñ hai

ehsās-e-sadāqat jo nahīñ ahl-e-talab meñ
chehroñ pe bhī īmān kā vo nuur nahīñ hai

maanā ki har ik ishrat-e-ālam hai mayassar
insān magar aaj bhī masrūr nahīñ hai

har qaum kā ehsās nahīñ jis ke amal meñ
dar-asl vo jamhūr bhī jamhūr nahīñ hai

hai 'nāz' kā har sher ḳhud ik sham-e-farozāñ
ye baat alag hai ki vo mash.hūr nahīñ hai

wo kaun hai duniya mein jo majbur nahin hai
insan ko kisi baat ka maqdur nahin hai

har shai pe tere husn ka jadu hai azal se
kya chiz tere husn se mashur nahin hai

mahkum bana leta bashar arz-o-sama ko
lekin wo kare kya use maqdur nahin hai

duniya mein use aish-o-masarrat na milenge
wo dil jo gham-e-ishq se ranjur nahin hai

mana ki haqiqat ko samajhna nahin aasan
insan haqiqat se magar dur nahin hai

hai sahab-e-iman ki kami ahl-e-jahan mein
ek raaz bhi warna tera mastur nahin hai

uTTho ki zamane ko gunahon se bachaen
jo din hai qayamat ka wo din dur nahin hai

kuchh kijiye aamal sanwar jaen jahan mein
kuchh sochiye ab waqt-e-qaza dur nahin hai

tufan ki har mauj hai ek dars-e-haqiqat
sahil pe pahunchna mujhe manzur nahin hai

ehsas-e-sadaqat jo nahin ahl-e-talab mein
chehron pe bhi iman ka wo nur nahin hai

mana ki har ek ishrat-e-alam hai mayassar
insan magar aaj bhi masrur nahin hai

har qaum ka ehsas nahin jis ke amal mein
dar-asl wo jamhur bhi jamhur nahin hai

hai 'naz' ka har sher KHud ek sham-e-farozan
ye baat alag hai ki wo mashhur nahin hai

Source: Subh-e-Hayat