saaf kab imtihān lete haiñ
vo to dam de ke jaan lete haiñ

yuuñ hai manzūr ḳhāna-vīrānī
mol merā makān lete haiñ

tum taġhāful karo raqīboñ se
jānñe vaale jaan lete haiñ

phir na aanā agar koī bheje
nāma-bar se zabān lete haiñ

ab bhī gir paḌ ke zof se naale
sātvāñ āsmān lete haiñ

tere ḳhanjar se bhī to ai qātil
nok kī nau-javān lete haiñ

apne bismil kā sar hai zaanū par
kis mohabbat se jaan lete haiñ

ye sunā hai mire liye talvār
ik mire mehrbān lete haiñ

ye na kah ham se tere muñh meñ ḳhaak
is meñ terī zabān lete haiñ

kaun jaatā hai us galī meñ jise
duur se pāsbān lete haiñ

manzil-e-shauq tai nahīñ hotī
Thekiyāñ nā-tavān lete haiñ

kar guzarte haiñ ho burī ki bhalī
dil meñ jo kuchh vo Thaan lete haiñ

vo jhagaḌte haiñ jab raqīboñ se
biich meñ mujh ko saan lete haiñ

zid har ik baat par nahīñ achchhī
dost kī dost maan lete haiñ

musta.id ho ke ye kaho to sahī
aa.iye imtihān lete haiñ

'dāġh' bhī hai ajiib sehr-bayāñ
baat jis kī vo maan lete haiñ

saf kab imtihan lete hain
wo to dam de ke jaan lete hain

yun hai manzur KHana-virani
mol mera makan lete hain

tum taghaful karo raqibon se
jaanne wale jaan lete hain

phir na aana agar koi bheje
nama-bar se zaban lete hain

ab bhi gir paD ke zof se nale
satwan aasman lete hain

tere KHanjar se bhi to ai qatil
nok ki nau-jawan lete hain

apne bismil ka sar hai zanu par
kis mohabbat se jaan lete hain

ye suna hai mere liye talwar
ek mere mehrban lete hain

ye na kah hum se tere munh mein KHak
is mein teri zaban lete hain

kaun jata hai us gali mein jise
dur se pasban lete hain

manzil-e-shauq tai nahin hoti
Thekiyan na-tawan lete hain

kar guzarte hain ho buri ki bhali
dil mein jo kuchh wo Than lete hain

wo jhagaDte hain jab raqibon se
bich mein mujh ko san lete hain

zid har ek baat par nahin achchhi
dost ki dost man lete hain

mustaid ho ke ye kaho to sahi
aaiye imtihan lete hain

'dagh' bhi hai ajib sehr-bayan
baat jis ki wo man lete hain

RECITATIONS Nomaan Shauque



00:00/00:00 saf kab imtihan lete hain Nomaan Shauque

Source: Book : ras-Rang(Mehfil-e-Adab) (Pg. 7) Edition : 2001