mujhe aish o ishrat kī qudrat nahīñ hai
karūñ tark-e-duniyā to himmat nahīñ hai

kabhī ġham se mujh ko farāġhat nahīñ hai
kabhī aah o naale se fursat nahīñ hai

safoñ kī safeñ āshiqoñ kī ulaT deñ
qayāmat hai ye koī qāmat nahīñ hai

barastā hai meñh maiñ tarastā huuñ mai ko
ġhazab hai ye bārān-e-rahmat nahīñ hai

mire sar pe zālim na laayā ho jis ko
koī aisī duniyā meñ aafat nahīñ hai

hai milnā mirā faḳhr aalam ko lekin
tire paas kuchh merī hurmat nahīñ hai

maiñ gor-e-ġharībāñ pe jā kar jo dekhā
ba-juz naqsh-e-pā lauh-e-turbat nahīñ hai

burī hī tarah mujh se rūThī haiñ mizhgāñ
unheñ kuchh bhī chashm-e-muravvat nahīñ hai

tū kartā hai iblīs ke kaam zāhid
tire fel par kyūñke lānat nahīñ hai

maiñ dil khol 'tābāñ' kahāñ jā ke ro.uuñ
ki donoñ jahāñ meñ farāġhat nahīñ hai

mujhe aish o ishrat ki qudrat nahin hai
karun tark-e-duniya to himmat nahin hai

kabhi gham se mujh ko faraghat nahin hai
kabhi aah o nale se fursat nahin hai

safon ki safen aashiqon ki ulaT den
qayamat hai ye koi qamat nahin hai

barasta hai meinh main tarasta hun mai ko
ghazab hai ye baran-e-rahmat nahin hai

mere sar pe zalim na laya ho jis ko
koi aisi duniya mein aafat nahin hai

hai milna mera faKHr aalam ko lekin
tere pas kuchh meri hurmat nahin hai

main gor-e-ghariban pe ja kar jo dekha
ba-juz naqsh-e-pa lauh-e-turbat nahin hai

buri hi tarah mujh se ruThi hain mizhgan
unhen kuchh bhi chashm-e-murawwat nahin hai

tu karta hai iblis ke kaam zahid
tere fel par kyunke lanat nahin hai

main dil khol 'taban' kahan ja ke roun
ki donon jahan mein faraghat nahin hai

RECITATIONS Fasih Akmal



00:00/00:00 mujhe aish o ishrat ki qudrat nahin hai Fasih Akmal

Source: Book : Shab Charagh (Pg. 129) Author : Bakhtiyar Ziya Publication : Markaz-e-adab (1993) Edition : 1993