Subscribe to our newsletter and get our newest updates

Ibrat Machlishahri

  • Ghazal


apne ehsanon ka nila saeban rahne diya


apne ehsānoñ kā niilā sā.ebāñ rahne diyā
chhīn lī chhat aur sar par āsmāñ rahne diyā

aaj us kī be-zabānī ne mujhe samjhā diyā
kis liye fitrat ne gul ko be-zabāñ rahne diyā

zindagī to kyā asāsa tak nahīñ baaqī bachā
qātiloñ ne ab ke bas ḳhālī makāñ rahne diyā

ḳhauf-e-rusvā.ī se maiñ ne ḳhat jalā Daalā magar
jaane kyuuñ us chāñd se lab kā nishāñ rahne diyā

dostī ko apnī majbūrī nahīñ samjhā kabhī
fāsla maiñ ne barābar darmiyāñ rahne diyā

be-gunāhī kī safā.ī de bhī saktā thā magar
kuchh samajh kar maiñ ne us ko bad-gumāñ rahne diyā

aag ke bāzīgaroñ ne ab ke khel aisā khelā
shahr kī taqdīr meñ ḳhālī dhuāñ rahne diyā

kyā siyāsī chaal hai ye zālimān-e-vaqt kī
le liyā sab kuchh magar ik ḳhauf-e-jāñ rahne diyā

chauñk chauñk uThtā huuñ maiñ rātoñ ko 'ibrat' ḳhauf se
ḳhvāb us ne merī āñkhoñ meñ kahāñ rahne diyā

apne ehsanon ka nila saeban rahne diya
chhin li chhat aur sar par aasman rahne diya

aaj us ki be-zabani ne mujhe samjha diya
kis liye fitrat ne gul ko be-zaban rahne diya

zindagi to kya asasa tak nahin baqi bacha
qatilon ne ab ke bas KHali makan rahne diya

KHauf-e-ruswai se main ne KHat jala Dala magar
jaane kyun us chand se lab ka nishan rahne diya

dosti ko apni majburi nahin samjha kabhi
fasla main ne barabar darmiyan rahne diya

be-gunahi ki safai de bhi sakta tha magar
kuchh samajh kar main ne us ko bad-guman rahne diya

aag ke bazigaron ne ab ke khel aisa khela
shahr ki taqdir mein KHali dhuan rahne diya

kya siyasi chaal hai ye zaliman-e-waqt ki
le liya sab kuchh magar ek KHauf-e-jaan rahne diya

chaunk chaunk uThta hun main raaton ko 'ibrat' KHauf se
KHwab us ne meri aankhon mein kahan rahne diya


Source: Book : Junoon (Pg. 112) Author : Naseem Muqri Publication : Naseem Muqri (1990) Edition : 1990

Leave a comment

+